މ. ދިއްގަރުގައި ސްވިމިންގ ޓްރެކެއް އެޅުމުގެ ޢަމަލީ މަސައްކަތް މި އަހަރު ފައްޓަވާނެ ކަމަށް ސްޕޯޓްސް މިނިސްޓަރ އަބްދުﷲ ރާފިއު ވިދާޅުވެއްޖެއެވެ.
ފަތަން ދަސްކޮށްދިނުމުގެ ގޮތުން ސްޕޯޓްސް މިނިސްޓްރީއާއި މުލަކު އަތޮޅު ދިއްގަރު ކައުންސިލް އާއި އެ ރަށުގެ ޕޮލިސް ސްޓޭޝަންގެ އިތުރުން ސްވިމިން އެސޯސިއޭޝަނުން ގުޅިގެން ދިއްގަރުގައި ކުރިއަށްގެންދިޔަ "ފަތަމާ ހިނގާ" ޕްރޮގްރާމް ނިމުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ ދިއްގަރުން އެކަނި 200 އަށްވުރެ ގިނަ ކުދިން އެ ޕްރޮގްރާމްގައި ބައިވެރިވެ ފަތަން ދަސްކުރުމަކީ މިކަހަލަ ޕްރޮގްރާމްތައް ކުރިއަށްގެންދަން ލިބުނު ހިތްވަރެއް ކަމަށެވެ.
މިނިސްޓަރ ވިދާޅުވީ ދިއްގަރަކީ ފަތަން ދަސްކުރުމަށް ވާދަވެރި މާޙައުލެއް އޮތް ރަށެއް ކަމަށާއި އެ ރަށަށް މިހާރު ބޭނުންވަނީ ސްވިމިންގ ޓްރެކެއް ކަމަށެވެ. އެގޮތުން މި ޕްރޮގްރާމުން އުނގެނުނު އެއްޗެއްގެ ބޭނުން ހިފައި ދެމެހެއްޓެނިވި ގޮތެއްގައި އެ މަސައްކަތް ކުރިއަށް ގެންދެވޭ މަގު ފަހިކޮށްދެއްވާނެ ކަމަށް މިނިސްޓަރ ވިދާޅުވިއެވެ.
Advertisement
އެގޮތުން މިނިސްޓަރ ވިދާޅުވީ ދިއްގަރުގައި ސްވިމިންގ ޓްރެކެއް އެޅުމުގެ ޢަމަލީ މަސައްކަތް މިއަހަރުގެ ތެރޭގައި ފެށޭނެ ކަމަށެވެ.
