ހަށިހެޔޮ މުޖުތަމަޢެއް ބިނާކުރުމުގެ މަޤްޞަދުގައި ކުރިއަށްގެންދާ "ހަށިހެޔޮ ރާއްޖެ" ޕްރޮގްރާމުގެ ލީޑަރުން ތަމްރީންކުރުމުގެ ދެވަނަ ފިޔަވަހި ނިންމާލައިފިއެވެ.
ކުޅިވަރާއި ހަށިހެޔޮކަމާއި ބެހޭ ވުޒާރާއިން ބުނީ "ހަށިހެޔޮ ރާއްޖެ" ޕްރޮގްރަމްގެ ތެރެއިން ރާއްޖޭގެ އަތޮޅުތައް 6 ޒޯނަކަށް ބަހާލައިގެން ލީޑަރުން ތަމްރީންކުރުމުގެ މަސައްކަތް ކުރިއަށްދާނެ ކަމަށެވެ. އެގޮތުން ޒޯން 1ގައި ހިމެނޭ ހއ، ހދ އަދި ށ އަތޮޅުގެ ރަށްރަށުގައި ހިމެނޭ ސްޕޯޓްސް ކައުންސިލަރުންނާއި ޔޫތު އެސޯސިއޭޓުން ތަމްރީން ކުރުމުގެ ޕްރޮގްރާމް މި މަހުގެ ކުރީކޮޅު ކުރިއަށްގެންގޮސްފައިވާ ކަމަށް ވުޒާރާއިން ބުންޏެވެ.
ދެވަނަ ފިޔަވަހީގައި ނިމުނީ މި ސަރަޙައްދުގެ އަތޮޅުތައް ކަމަށްވާ ކ. ވ. އއ. އަދި އދގެ އަތޮޅުގެ ރަށްރަށުގައި ހިމެނޭ ސްޕޯޓްސް ކައުންސިލަރުންނާއި ޔޫތު އެސޯސިއޭޓުން ތަމްރީންކުރުމުގެ ޕްރޮގްރާމް ކަމަށް ވުޒާރާއިން ބުންޏެވެ. މި ޕްރޮގްރާމްގައި ސްޕޯޓްސް ކައުންސިލަރުންނާއި، ޔޫތު އެސޯސިއޭޓުންގެ ޒިންމާތަކާއި އެމީހުންގެ ރޯލަކީ ކޮބައިކަމާއި ކުޅިވަރާ ބެހޭ ވުޒާރާގެ މެންޑޭޓުގައިވާ ކަންތައްތަކަކީ ކޮބައިކަން ޙިއްސާކޮށް އަހުލުވެރިކުރުވާފައިވާ ކަމަށް ވުޒާރާއިން ބުންޏެވެ.
Advertisement
ވުޒާރާއިން ބުނީ މި ތަމްރީންތަކުގެ ތެރެއިން ތިއަރީ ކްލާސްތަކާއި، ފިޒިކަލް އެކްޓިވިޓީތަކުގެ އިތުރުން ލީޑާޝިޕް ތަމްރީންތަކާއި، މެނޭޖްމަންޓް އަދި މަޤާމާ ގުޅުންހުރި އެހެން ދާއިރާތަކުގެ ތަމްރީންތައްވެސް ދީފައިވާ ކަމަށެވެ.
"ހަށިހެޔޮ ރާއްޖެ" ޕްރޮގްރާމްގެ މައިގަނޑު މަޤްޞަދަކީ ރަށްރަށުގައި އެކި އުމުރު ފުރައިގެ މީހުންނަށް ފިޓްނަސް ޕްރޮގްރާމްތައް ކުރިއަށް ގެންދާއިރު ތަފާތު ހަރަކާތްތައް ގެންދާނެ އެންމެ ރަނގަޅު ގޮތްތައް އަންގައިދިނުން ކަމަށް ވުޒާރާއިން ބުންޏެވެ. އަދި މުޖުތަމަޢު ތަމްރީން ޕްރޮގްރާމްތަކާއި ހަރަކާތްތައް ކުރިއަށް ގެންދިއުމުގައި އެރަށަކަށް އެންމެ އެކަށޭނެ ޕްރޮގްރާމަކީ ކޮބައިތޯ އާއި އިވެންޓުތައް މެނޭޖްކުރާނެ ގޮތްތައް އަންގައިދިނުމާއި، މަޤްބޫލު އިވެންޓެއްގެ ގޮތުގައި ގެންދާނެ ގޮތްތައް ދަސްކޮށްދިނުން ކަމަށް ވުޒާރާއިން ބުންޏެވެ.
