އިޒްރޭލުން ހިޒްބުﷲއާއި ހަނގުރާމަކުރުމުގެ ގޮތުން ލުބްނާންގެ އާންމުން ދިރިއުޅޭ ސަރަޙައްދެއް ހުސްކުރަން އަންގައިފިއެވެ.

ލު އޮރިއެންޓުން ވައްޒާނީގެ މޭޔަރު ވައްޒާނީ އަހްމަދާއި ހަވާލާދީ ރިޕޯޓްކުރި ގޮތުގައި ހަސްބަޔާ އަވަށުގައި ވައްޒާނީގައި ދިރިއުޅޭ އާންމުން އެ ސަރަޙައްދު ދޫކޮށްފައި ދިއުމަށް އިޒްރޭލުން ވަނީ ލީފްލެޓްތައް ވައްޓައިގެން އަންގާފައެވެ.

މީގެ ކުރިންވެސް އިޒްރޭލުން ވަނީ ލުބްނާންގެ ޖިއްޔޭ ސަރަޙައްދުން އާންމުން އެހެން ތަނަކަށް ބަދަލުވުމަށް އިންޒާރުދީފައެވެ. އިޒްރޭލުން މިމަހުގެ ކުރީކޮޅު އެގޮތަށް ކަންތައް ކުރީ ލުބްނާންގެ ކުރީގެ ސޯޝަލިސްޓް ޕާޓީގެ ލީޑަރު ވަލީދް ޖަމްބްލަތްއާއި ހިޒްބުﷲ އަށް ހަމަލާދިނުމުގެ ނިޔަތުގައެވެ. އެއީ އޮގަސްޓް މަހުގެ ފަހުކޮޅު ހިޒްބު ﷲ އިން މިސައިލް ރައްކާކޮށްފައިވާ ބިންގަރާހެއްގެ ވީޑިއޯއެއް އާންމުކުރި ފަހުން އިޒްރޭލުން ނިންމި ނިންމުމެއް ކަމަށް ލު އޮރިއެންޓް އިން ރިޕޯޓްކޮށްފައިވެއެވެ.

ލުބްނާން ރައްޔިތުންގެ މެދުގައި ލުބްނާންގެ ހަނގުރާމަވެރިންގެ ޖަމާއަތެއް ކަމުގައިވާ ހިޒްބުﷲ ގެ ތާއީދު އުވާލަން އިޒްރޭލު ސިފައިން ވަނީ އަޑުހަރު ކުރާ ބޭނުންކޮށްގެން ޕްރޮޕަގެންޑާ ފަތުރަންވެސް މަސައްކަތް ކޮށްފައެވެ.

އަލްޖަޒީރާ އިން ރިޕޯޓްކުރި ގޮތުގައި ލުބްނާނަށް މިހާރު އިޒްރޭލުން ދެމުންގެންދާ ޙަމަލާތައް އިތުރަށް ވަރުގަދަކޮށްފިނަމަ، ދެ ފަރާތަށްވެސް ގެއްލުންވުމުގެ އިތުރަށް އިޒްރޭލުގެ ސިފައިންނަށްވެސް ގެއްލުންތަކެއް ކުރިމަތިވާނެ ކަމަށް ހިޒްބުﷲގެ ޑެޕިއުޓީ ލީޑަރު ނައީމް ގާސިމް ވިދާޅުވެފައިވެއެވެ.

އިޒްރޭލުގެ ޑިފެންސް މިނިސްޓަރު ޔޮއާވް ގަލަންތްވެސް ވަނީ އިޒްރޭލުން ގައްޒާގައި ހިންގަމުންދާ އަސްކަރީ އޮޕަރޭޝަން ނިމުމަކަށް އައިސްފައިވާ ކަމަށް ބުނެފައެވެ. އެއަށްފަހު ލުބްނާންގެ އުތުރުގައި އަސްކަރީ އޮޕަރޭޝަން ހިންގަން އުޅޭ ކަމަށް އޭނާ މައުލޫމާތުދީފައިވެއެވެ.

އިޒްރޭލާއި ހިޒްބުﷲ އާއި ދެމެދު ހަމަނުޖެހުން އުދެފިފައިވަނީ 2008 ވަނަ އަހަރުން ފެށިގެންނެވެ. ނަމަވެސް، 7 އޮކްޓޫބަރުގައި އިޒްރޭލުން ގައްޒާގައި ފެށި ހަނގުރާމައަށްފަހު ހިޒްބުﷲ އިން ވަނީ ފަލަސްތީން މިނިވަން ކުރުމަށް އިޒްރޭލާއި ހަނގުރާމަ ކުރަން ފަށާފައެވެ. އެއާއެކު، މިއަހަރު ތެރޭ އިޒްރޭލުން ވަނީ ހިޒްބުﷲ ކިބައިން ބަދަލު ހިފުމުގެ ގޮތުން ލުބްނާން އާއި އިޒްރޭލުގެ ބޯޑަރުގައި ހަމަލާ ބަދަލުކުރުންތައް ވަރުގަދަކޮށްފައެވެ.