2011 ވަނަ އަހަރު ދިވެހި ރައްޔިތުންނަށް ހިލޭ ބޭސްފަރުވާގެ ޚިދުމަތް ފޯރުކޮށްދިނުމަށް އުފެއްދި އާސަންދަ ކުންފުނިން ވޭތުވެދިޔަ 13 އަހަރުގެ ތެރޭގައި ދައުލަތުގެ ބަޖެޓުން ކުރާ ޚަރަދު އަހަރުން އަހަރަށް އިތުރުވަމުން ގޮސްފައިވާކަމަށް މާލީ ވުޒާރާއިން ބުނެފައިވެއެވެ.
މިގޮތުން 2022 ވަނަ އަހަރު އާސަންދައިން 2.8 ބިލިއަން ރުފިޔާ ބިލުކޮށްފައިވާއިރު، 2023 ވަނަ އަހަރު މި އަދަދު 3.2 ބިލިއަން ރުފިޔާއަށް އިތުރުވެފައިވާކަމަށް އެ ވުޒާރާއިން ބުނެއެވެ. މީގެތެރެއިން އެންމެ ބޮޑު ޚަރަދެއް ހޭދަވަނީ ބޭހާއި ކޮންސިއުމަބަލްސް އަށްކަން ފާހަގަ ކޮށްފައި ވެއެވެ.
ރާއްޖޭގައި ބޭހުގެ އަގު ބޮޑުކަން ފާހަގަކުރަމުން، ރައީސް ޑރ.މުޙައްމަދު މުޢިއްޒު ވެސް ވަނީ ކަންބޮޑުވުން ފާޅުކުރައްވާފައެވެ. އެމަނިކުފާނު ވިދާޅުވީ ރާއްޖޭގައި ބޭސް ވިއްކަމުން އައީ 200% އާއި 2000%އާއި ދެމެދުގެ ފައިދާއެއް ލާފައެވެ. މިއީ ހަމަ ގައިމުވެސް އާސަންދައިގެ ބަޖެޓުން ބޭރުވާ ފައިސާއެވެ.
Advertisement
މާލީ ވުޒާރާއިން ބުނެފައިވަނީ އާސަންދައިގެ ޚަރަދު ކުޑަކުރުމަށްޓަކައި ސަރުކާރުން ވަނީ ބަލްކް ޕްރޮކިއުމެންޓް އުސޫލުން ބޭސް ގެނައުމަށް ނިންމާފައި ކަމަށެވެ. މިއީ އާސަންދައިގެ ޚަރަދު ކުޑަކުރުމަށް ލިބޭނެ ލުޔެއް ކަމަށްވެސް އެ ވުޒާރާއިން ބުނެފައިވެއެވެ.
އާސަންދައިގެ ޚިދުމަތްތަކަށް ކުރާ ޚަރަދު އިތުރުވަމުންދާއިރު، ދައުލަތުގެ ބަޖެޓަށް އިންތިހާއަށް ބުރަ ވެފައިވާތީވެ، އެކަން ހައްލުކުރުމަށް އިތުރު ފިޔަވަޅުތަކެއް އަޅަން ޖެހިފައިވާކަމަށް މާލީ ވުޒާރާއިން ފާހަގަކޮށްފައިވެއެވެ. ނަމަވެސް ރައްޔިތުންނަށް ދެމުންދާ މި މުހިންމު ޚިދުމަތް ހުއްޓުމެއްނެތި ކުރިއަށް ގެންދިއުމަކީ ސަރުކާރުގެ އަމާޒު ކަމުގައިވެސް އެ ވުޒާރާއިން ބުނެފައިވެއެވެ.
