ދިވެހިރާއްޖޭގައި ބޭސްތައް ވިއްކަމުންދަނީ %200 އާއި %2000 އާއި ދެމެދުގެ ބޮޑު އަގެއްގައި ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

މިހާ ބޮޑު މާކަޕްތަކެއްގައި މެޑިކަލް ޑުރަގުތައް ވިއްބޭހުގެ ވިޔަފާރިކުރާ ފަރާތްތަކުން ނާޖާއިޒް ފައިދާ ނަގާފައިވާތީ މި ސަރުކާރުން ވަނީ އަވަސް ފިޔަވަޅުތަކެއް އަޅާފައެވެ. ރައީސުލްޖުމްހޫރިއްޔާ ކުރެއްވި އެކްސް ޕޯސްޓެއްގައި ހާމަކުރެއްވި ގޮތުގައި ކުރީގެ ވެރިކަމުގައި އަހަރުތަކެއް ވަންދެން ދެމިއޮތް މި ނާޖާއިޒު އަގު ހުއްޓުވުމަށް އަޅަންޖެހޭ ފިޔަވަޅުތައް އަޅަން ކަމާބެހޭ ހުރިހާ އިދާރާތަކަށް އަންގާފައިވެ އެވެ.

"ޑޮކްޓަރީ ބޭސް ރާއްޖެ އެތެރެކޮށް ވިއްކާ އަގުތައް ރާއްޖޭގެ ބާޒާރުގައި މިހާތަނަށް ހުރީ %200 އިން ފެށިގެން %2000 އާއި ދެމެދުގެ ފައިދާއެއް ނަގާ މިންވަރުގައި. ބޭސް ވިއްކުމުގައި މިވަރުގެ ބޮޑު ފައިދާ ނެގުން ހުއްޓުވުމަށްޓަކައި އަޅަންޖެހޭ ފިޔަވަޅުތައް އެޅުމަށް ކަމާގުޅުންހުރި އެންމެހައި މުއައްސަސާތަކަށް މިހާރު ވާނީ އަންގާފައި. މީގެ ސަބަބުން، ބޭހުގެ ބާޒާރު އަގާއި އާސަންދައިން ޗާޖުކުރާ އަގު ދަށްކުރެވިގެންދާނެ. މި ބަދަލު ގެނައުމަށް ހަމަޖެހިފައިވާ ގޮތުގެ ތާވަލާއި ތަފްސީލު ވަރަށް އަވަހަށް އާންމުކޮށް އިޢުލާންކުރެވޭނެ. މި ބަދަލުގެ ނަތީޖާއެއްގެ ގޮތުން، އާސަންދައިން އިސްރާފުވަމުންދާ ގިނަ އަދަދެއްގެ ފައިސާ (އެތައް ސަތޭކަ މިލިއަން ރުފިޔާ) ސަލާމަތްކުރެވި، ޞިއްޙީ ޚިދުމަތުގެ ފެންވަރު މަތިކުރުމަށް އެ ފައިސާ ބޭނުންކުރެވޭނެ މަގު ތަނަވަސްވެގެންދާނެ." ރައީސުލްޖުމްހޫރިއްޔާ އެކްސްގައި ވިދާޅުވިއެވެ.

1 ރުފިޔާއަށް ލިބޭ ބޭސް 20 ރުފިޔާއަށް ރައްޔިތުންނަށް ދީގެން ނިކަމެތި ބަލިމީހުންގެ އަތުން ނާޖާއިޒް ފައިދާ ނަގަމުންދިޔައިރު ކުރީގެ ސަރުކާރުތަކުން އެކަމާއި އަޅާނުލައި ދޫކޮށްލާފައިވާތީ، ރައީސް މުޢިއްޒު މި ގެންނަ ބަދަލުގެ ސަބަބުން އާސަންދަ ފަދަ ބޮޑެތި ސަޕްލައި ކުރާ ކުންފުނިތަކުން ވިއްކާ ބޭސްތައް ހިމެނޭ ގޮތަށް ބާޒާރުގައި ހުރި ބޭހުގެ އަގު ވަރަށް ބޮޑަށް ދަށްވެގެންދާނެއެވެ. 

ސިއްހީ ފަރުވާ އަގުހެޔޮކޮށް ފޯރުކޮށްދިނުމަށް ސަރުކާރުގެ ފުޅާ އެޖެންޑާގެ ތެރެއިން، ބޭސް ވިއްކަންޖެހޭ އަގުތައް ސަރުކާރުން ވަރަށް އަވަހަށް ކަނޑައަޅާނެއެވެ.

ޒަމާނުއްސުރެ އަޅާނުލައި ދޫކޮށްލި މިމައްސަލައަށް ހައްލެއް ހޯދައިދީގެން ސަރުކާރުގެ އަމާޒަކީ، ބޭހުގެ އަގު ބޮޑުވުމުގެ ސަބަބުން މިވަގުތު ބޭކާރުވަމުންދާ އެތައް ސަތޭކަ މިލިއަން ރުފިޔާ ސަލާމަތްކުރުމެވެ. މި ރައްކާކުރާ ފައިސާ އަލުން އިންވެސްޓްކުރާނީ ރައްޔިތުންނަށް ސިއްހީ ހިދުމަތުގެ ފެންވަރު މަތިކުރުމަށް ކަމަށް ރައީސުލް ޖުމްހޫރިއްޔާ ވިދާޅުވިއެވެ.