ސިނަމާލެ ބްރިޖް ޕެޓްރޯލް ކުރުމަށް ފުލުހުން ސައިކަލު ބޭނުންކުރަން ފަށައިފިއެވެ. މި މަޢުލޫމާތު ހާމަކުރެއްވީ ދައުލަތުގެ މީޑިއާގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ފުލުހުންގެ ޗީފް އިންސްޕެކްޓަރު މުޙައްމަދު ލުޠުފީއެވެ.
ޗީފް އިންސްޕެކްޓަރު ލުޠުފީ ވިދާޅުވި ގޮތުގައި ސިނަމާލެ ބްރިޖަކީ އެކްސިޑެންޓް އެންމެ ގިނައިން ހިނގާ ސަރަހައްދެވެ. އެހެންކަމުން، ކާރުގެ ބަދަލުގައި ސައިކަލު ބޭނުންކުރުމުން އެކްސިޑެންޓް ހިނގާ ސަރަހައްދަށް އަވަހަށް ދެވޭނެ ކަމަށާއި، މިކަމުގެ ސަބަބުން ޓްރެފިކް ފްލޯ އަވަހަށް ހަމައަކަށް އެޅޭނެ ކަމަށް އޭނާ ވިދާޅުވިއެވެ.
"އެފަދަ އެކްސިޑެންޓުތައް މަދު ކުރުމަށް ބްރިޖުގައި ޕެޓްރޯލުކުރުން ހަރުދަނާ ކުރުމަށް މަސައްކަތުގެ ތެރެއިން މިހަފުތާ ނިމުމުގެ ކުރިން ބްރިޖް ޕެޓްރޯލް ކުރުމަށްޓަކައި ފުލުހުން ސައިކަލު ބޭނުން ކުރަން ފަށާނެ. ބްރިޖުގައި ޕެޓްރޯލު ކުރުމަށް ސައިކަލު ބޭނުން ކުރަން ފެށުމުން އިތުރު ފަސޭހަތަކެއް ލިބޭނެ. ބްރިޖް އަރިމަތީގައި ޕާކުކޮށްގެން ފޯނުކުރުން ފަދަ ކަންކަމުގައި މަޑުކޮށްގެން ތިބޭ މީހުން ފޮނުވާލަން އޭރުން ފަސޭހަވާނެ."، ލުތުފީ ވިދާޅުވިއެވެ.
Advertisement
މީގެ އިތުރުން، ސައިކަލު ބޭނުންކުރުމުގެ ސަބަބުން ފުލުހުންގެ ހަރަކާތްތައް އިތުރުވެ، ކުށްކުރާ ފަރާތްތައް ދެނެގަނެވޭނެ ކަމަށް ވެސް ޗީފް އިންސްޕެކްޓަރު ލުޠުފީ ފާހަގަކުރެއްވިއެވެ.
ސިނަމާލެ ބްރިޖުގައި އެކްސިޑެންޓްތައް ގިނަވުމާ ގުޅިގެން ފުލުހުން 24 ގަޑިއިރު ޚާއްސަ އޮޕަރޭޝަނެއް ހިންގަމުންދާ ކަމަށްވެސް ޗީފް އިންސްޕެކްޓަރު ލުޠުފީ ހާމަކުރެއްވިއެވެ.
