އިންޑިއާއާއި ދިވެހިރާއްޖެއާ ދެމެދު އޮތް އަސްކަރީ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެއްވުމަށް، ފަސްވަނަ "އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގް" އިންޑިއާގެ ނިއުދިއްލީގައި ބާއްވައިފިއެވެ. މި މަޝްވަރާތަކުގައި ބައިވެރިވެ ވަޑައިގަތުމަށް ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ އިންޑިޔާއަށް ރަސްމީ ދަތުރުފުޅެއް ކުރެއްވާފައިވެއެވެ.

މި މަޝްވަރާތަކުގައި ދިވެހި ވަފުދުގެ ވެރިއަކަށް ހުންނެވީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީއެވެ. އަދި އިންޑިއާގެ ފަރާތުން ވަފުދުގެ ވެރިއަކަށް ހުންނެވީ އިންޑިއާގެ ޑިފެންސް ސެކްރެޓަރީ ޝްރީ ގިރިދަރު އަރަމަނޭއެވެ.

މި ދަތުރުފުޅުގައި މޭޖަރ ޖެނެރަލް ޙިލްމީ ވަނީ އިންޑިއާގެ އިސް އަސްކަރީ ވެރިންނާ ބައްދަލުކުރައްވައި، ދެ ޤައުމުގެ އަސްކަރީ ގުޅުމާއި ސަރަޙައްދީ ސަލާމަތާމެދު މަޝްވަރާ ކުރައްވާފައެވެ. މީގެ އިތުރުން، އޭނާ ވަނީ އިންފޮމޭޝަން ފިއުޝަން ސެންޓަރ - އިންޑިއަން އޯޝަން ރީޖަންއަށް ޒިޔާރަތްކުރައްވައި އެ ތަނުގެ މަސައްކަތްތައް ބައްލަވާލައްވާފައެވެ.

މި މަޝްވަރާތަކުގައި ދެ ޤައުމުގެ ދިފާޢީ ގުޅުން ބަދަހިކުރުމަށް މަޝްވަރާކުރެވުނު ދާއިރާތަކުގެ ތެރޭގައި ދިފާޢީ އެއްބާރުލުން އިތުރުކުރުމާއި، ތަމްރީނާއި އުނގެނުމުގެ ފުރުސަތުތައް ފަހިކުރުމާއި، މަޢުލޫމާތު ހިއްސާކުރުމާއި، އަދި ސަރަހައްދީ ކަނޑުގެ ސަލާމަތާއި ރައްކާތެރިކަން ހިމެނެއެވެ.

ދިވެހި ވަފުދުގައި ޗީފް އޮފް ޑިފެންސް ފޯސްގެ އިތުރުން އެމްއެންޑީއެފްގެ އިސް އޮފިސަރުންނާއި އިންޑިއާގައި ހުންނަ ދިވެހި ޑިފެންސް އެޑްވައިޒަރ ހިމެނިވަޑައިގަތެވެ. މޭޖަރ ޖެނެރަލް އިބްރާހީމް ހިލްމީ އިންޑިއާގެ މި ރަސްމީ ދަތުރުފުޅު ނިންމަވާލެއްވީ އާދީއްތަ ދުވަހުއެވެ.