ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް އުފައްދަވާފައިވާ ސިޔާސީ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އަކީ ސިޔާސީ ޕާޓީއެއްގެ ގޮތުގައި ޤަބޫލު ނުކުރެވޭ ކަމަށް ރައްޔިތުންގެ މަޖިލީހުގެ ގެމަނަފުށީ ދާއިރާގެ މެމްބަރު އަސަދުﷲ ޝިހާބް ވިދާޅުވެއްޖެއެވެ.

"އަސްލު ޓީވީ" ގެ ޕްރޮގްރާމެއްގައި ވާހަކަދައްކަވަމުން އަސަދުﷲ ވިދާޅުވީ ޕީއެންއެފް ފާހަގަވެގެންދަނީ "ފްރެންޑްސް އެންޑް ފެމިލީ" ކުޑަ ކުޑަ ކޮމިއުނިޓީއެއް ގޮތަށް ކަމަށެވެ.

ޕީއެންއެފް އިން ފާޅުގައި ސަރުކާރަށް ޖެއްސުން ކުރަމުން އަންނައިރު، އެކަމަށް ރައްދު ދެއްވާ އަސަދުﷲ ވިދާޅުވީ އެކަމާމެދު ސަރުކާރުގެ އެއްވެސް ސިހުމެއް ނެތް ކަމަށާއި އެ ފަރާތްތަކުން ދައްކަމުން އަންނަ ވާހަކަތަކަށް އެއްވެސް ޝައުޤުވެރިކަމެއް ވެސް ނެތް ކަމަށެވެ.

އަސަދުﷲ ވިދާޅުވީ ޕީއެންއެފް އިން ދައްކަމުން އަންނަނީ ތާކުން ތާކުން ނުޖެހޭ ވާހަކަ ކަމަށެވެ. އެގޮތުން ބްރިޖުގެ ލޭނެއް މަދުކަމަށް ބުނެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްތަށިފުޅުގައި އެކަން އެޅުވިކަން ފާހަގަކުރައްވާ އަސަދުﷲ ވަނީ އެއަށް ރައްދު ދެއްވާފައެވެ.

"ފުރަތަމަ ކަމަކަށް ކުރީގެ ރައީސް ޔާމީން ޤަބޫލުކުރޭ އޭރުގެ ސަރުކާރުން ގެނައި ހުރިހާ ތަރައްޤީގެ ޕްރޮޖެކްޓުތައް، ތަރައްޤީގެ ގޮތުން ގެނައި ކުރިއެރުންތަކަކީ އެމަނިކުފާނު ގެނައި އެއްޗެއް ކަމަށް. އެކަމަކު އޭގެ ޕްރޮޖެކްޓެއްގައި މައްސަލައެއް ޖެހިއްޖެ ނަމަ އެއީ މިނިސްޓަރުގެ މައްސަލައެއް. ކޮންމެވެސް ކަހަލަ އުޞޫލެއް އޮންނަން ވާނެ ނޫންތޯ. މިހާރު ބްރިޖު އެޅި މީހާއަށް ބްރިޖުގެ ކްރެޑިޓް ލިބެންޏާ ބްރިޖުގެ ލޭނެއް މަދުވެއްޖެޔާ އޭގެ ޒިންމާ ނަގަން ޖެހޭނީ ޔާމީނެއް ނޫންތޯ؟" އަސަދުﷲ ވިދާޅުވިއެވެ.

މީގެ އިތުރުން އެމްއެމްޕީއާރުސީން ގެނައި އިންވެސްޓުމަންޓްތަކަކީ ޔާމީން ގެނައި އިންވެސްޓްމަންޓްތަކަކަށް ވެފައި، އެ ކޯޕަރޭޝަނުގެ ލާރި ކާލީ އަދީބަށް ވަންޏާ އެމަނިކުފާނު ދައްކަވާ ވާހަކަތަކުގެ ސަބަބުން އެމަނިކުފާނުގެ މަޤުބޫލުކަން ވެސް ދަނީ ދަށަށް ކަމަށް އަސަދުﷲ ވިދާޅުވިއެވެ.

އަސަދުﷲ ވިދާޅުވީ ޔާމީން ދައްކަވާ އެފަދަ ވާހަކަތަކާމެދު ކަންބޮޑުވުމަކީ މި ސަރުކާރުގެ އެއްވެސް ޝައުޤެއް އޮތް ކަމެއް ނޫން ކަމަށެވެ.