އޮގަސްޓު މަހު ރާއްޖެއަށް 176،151 ފަތުރުވެރިން، އެންމެ ގިނައީ ޗައިނާއިން

ނިމިދިޔަ އޮގަސްޓު މަހު ރާއްޖެއަށް 176،151 ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިދިޔަ އަހަރުގެ އޮގަސްޓު މަހާ އަޅާބަލާއިރު މިއީ 13 އިންސައްތަ އިތުރު އަދަދެކެވެ. މިދިޔަ އަހަރުގެ އޮގަސްޓު މަހު ރާއްޖެއަށް ޒިޔާރަތްކޮށްފައިވަނީ 154،854 ފަތުރުވެރިންނެވެ.

މިދިޔަ މަހު އެންމެ ގިނައިން ފަތުރުވެރިން ޒިޔާރަތްކޮށްފައިވަނީ 14 ވަނަ ދުވަހު ކަމަށާއި، އެ ދުވަހު 7،032 ފަތުރުވެރިން ރާއްޖެއަށް އައިސްފައިވާ ކަމަށް ޓޫރިޒަމް މިނިސްޓްރީން ބުންޏެވެ. އަދި އެންމެ މަދުން ފަތުރުވެރިން ޒިޔާރަތްކޮށްފައިވަނީ 29 ވަނަ ދުވަހު ކަމަށާއި، އެ ދުވަހު 3،392 ފަތުރުވެރިން ޒިޔާރަތްކޮށްފައިވާ ކަމަށް ވެސް އެ މިނިސްޓްރީން ބުންޏެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުގައި މިދިޔަ މަހު ރާއްޖެއަށް އެންމެ ގިނައިން ޒިޔާރަތްކޮށްފައިވަނީ ޗައިނާ ފަތުރުވެރިންނެވެ. އެ ޤައުމުން 38،987 ފަތުރުވެރިން ރާއްޖެއަށް ވަނީ ޒިޔާރަތްކޮށްފައެވެ. ދެވަނައަށް އެންމެ ގިނަ ފަތުރުވެރިން އައިސްފައިވަނީ ރަޝިޔާއިންނެވެ. އެގޮތުން 20،407 ފަތުރުވެރިން ރަޝިޔާއިން އައިސްފައިވާއިރު، ތިންވަނައަށް އެންމެ ގިނައިން ފަތުރުވެރިން އައިސްފައިވަނީ އިޓަލީންނެވެ. އެގޮތުން އެ ޤައުމުން 14،080 ފަތުރުވެރިން ވަނީ ރާއްޖެ އައިސްފައެވެ.

މިހާރު ރާއްޖޭގައި 174 ރިސޯޓާއި، 14 ހޮޓެލާއި، 881 ގެސްޓް ހައުސްގެ އިތުރުން 153 ސަފާރީ އުޅަނދު އޮޕަރޭޓްކުރެއެވެ.

ސަރުކާރުގެ އަމާޒަކީ މި އަހަރު ދެ މިލިއަން ފަތުރުވެރިން ރާއްޖެ ގެނައުމެވެ.