ޔޫރަޕިއަން ޔޫނިއަނުން ރާއްޖޭގެ ތިމާވެށީގެ މަޝްރޫޢުތަކަށް 110 މިލިއަން ރުފިޔާގެ އެހީއެއް ލިބޭނެކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.
ވަޒީރު ޠާރިޤް އިބްރާހިމް ވިދާޅުވިގޮތުގައި، މިހާރު ކުރިއަށްދާ މަޝްރޫޢުތަކަށް ގްލޯބަލް އެންވަޔަރަމަންޓް ފެސިލިޓީން 2.5 މިލިއަން ރުފިޔާ ޚަރަދުކުރެއެވެ. އަދި އެއްފަހަރު ބޭނުންކޮށްފައި އުކާލާ ޕްލާސްޓިކް މަދުކުރުމާއި ތިމާވެށި ހިމާޔަތްކުރުމުގެ މަޝްރޫޢުތަކަށް މި އެހީ ލިބޭނެކަމަށް ވިދާޅުވިއެވެ. މި އައު މަޝްރޫޢުތައް ފެށުމަށް ހަމަޖެހިފައިވަނީ އަންނަ އަހަރުއެވެ.
ތިމާވެށި ހިމާޔަތް ކުރުމަށް ކުރަމުންދާ މަސައްކަތުގެ ތެރޭގައި ސިންގަލް ޔޫސް ޕްލާސްޓިކް ބޭނުންކުރުން މަދުކުރުމަށް މަސައްކަތްކުރުމާއި، ސަރުކާރުން 5 މިލިޔަން ގަސް އިންދުމުގެ މަޝްރޫޢެއް ފަށައިފައިވާކަން މިނިސްޓަރު ފާހަގަކުރެއްވިއެވެ. އަދި ރަށްގިރުމުގެ މައްސަލަ ހައްލުކުރުމަށް ގޮނޑުދޮށް ހިމާޔަތްކުރުމުގެ މަސައްކަތްކުރަމުންދާކަމަށާއި، ތިމާވެށްޓާ ގުޅުންހުރި އެހެނިހެން މަޝްރޫޢުތައްވެސް ކުރިއަށްދާކަމަށް ވިދާޅުވިއެވެ.
