ޤައުމީ ދުވަހުގެ ޚާއްޞަ ދިދަ ނެގުމުގެ ރަސްމިއްޔާތުގައި ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު އާއި އަނބިކަނބަލުން ފަސްޓް ލޭޑީ ސާޖިދާ މުޙައްމަދު މިއަދު ހެނދުނު ބައިވެރިވެވަޑައިގެންފިއެވެ.

ގައުމީ ދުވަސް ފާހަގަކުރުމުގެ ގޮތުން ބޭއްވި "ފެށުމުގެ" ރަސްމިއްޔާތު އޮތީ ޖުމްހޫރީ މައިދާނުގައި މިއަދު ހެނދުނު 6:00 ގައެވެ.

މި ރަސްމިއްޔާތުގައި ރައީސުލްޖުމްހޫރިއްޔާއާ އެކު ނައިބު ރައީސް ހުސައިން މުހައްމަދު ލަތީފާއި، އެމަނިކުފާނުގެ އަނބިކަނބަލުން އައިޝަތު އަފްރީން މުހައްމަދާއި، ސަރުކާރުގެ އެކި އިސް ބޭފުޅުން ބައިވެރިވެވަޑައިގެންނެވިއެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ރައީސް، އުއްތަމަ ފަނޑިޔާރާއި، ސްޓޭޓް މިނިސްޓަރުންނާއި، ބޭރު ޤައުމުތަކުގެ ސަފީރުންވެސް ބައިވެރިވެވަޑައިގެންނެވިއެވެ. މި ހަރަކާތުގައި ސަރުކާރުގެ މުއައްސަސާތަކާއި ސްކޫލް ދަރިވަރުން ބައިވެރިވެ، ގައުމީ އެއްބައިވަންތަކަން ދައްކައިދިނެވެ.

ރައީސުލްޖުމްހޫރިއްޔާ އާއި ފަސްޓް ލޭޑީ އަށް މަރުހަބާ ދެންނެވީ މިނިސްޓަރު އޮފް ޑިފެންސް މުހައްމަދު ޣައްސާން މައުމޫނާއި ދިވެހި ބަހާއި ސަގާފަތާއި ތަރިކައާބެހޭ ވަޒީރު އާދަމް ނަސީރު އިބްރާހީމެވެ.

މި ރަސްމިއްޔާތުގައި ޤައުމީ ދިދަ އުފުލުމާއި، ޚާއްޞަ ދުޢާއެއް، އަދި ޤައުމީ ދިފާޢީ ބާރުގެ ބޭންޑުން ޤައުމީ ލަވަ ކުޅުން އޮތެވެ. ކޮންމެ އަހަރެއްގެ ރަބީއުލްއައްވަލް މަހުގެ 1 ވަނަ ދުވަހު ފާހަގަކުރާ ޤައުމީ ދުވަހަކީ ޕޯޗުގަލްގެ ވެރިކަމުން ރާއްޖެއަށް މިނިވަންވިކަން ލިބުމުގެ ޒިކުރާ އައުކުރާ ދުވަހެވެ.