މިއަދު ހެނދުނު ހައްދު ފަހަނައެޅި އިސްރާއީލު ހަތިޔާރު އެޅި ސިފައިންގެ އެހީތެރިކަމާއެކު ފަލަސްތީނުގައި ހުންނަ މާތްވެގެންވާ މަސްޖިދުލް އަޤްޞާއަށް އިސްރާއީލުގެ ފައުޖެއް ވަދެއްޖެ ކަމަށް ހަބަރު ލިބެއެވެ.
މެދުއިރުމަތީގެ ހަބަރުތައް ބުނާ ގޮތުގައި އިސްރާއީލުގެ ޔަހޫދީންތައް މަސްޖިދުލް އަޤްޞާ ތެރެއަށް ވަދެ އެތަނުގައި ނަމާދުކުރަން ތިިބި މުސްލިމުންނަށް ހުރަސް އެޅިއެވެ. އަދި މުޅި ސަރަހައްދުގައި ސެކިއުރިޓީ ވަރުގަދަ ކުރުމަށްފަހު މިސްިކިތުގެ ހުރުމަތް ކަނޑައި އެތާތެރޭގައި އަޅުކަން ކޮށްފައިވާ ކަމަށް ވެސް ބައެއް ހަބަރުތައް ބުނެއެވެ.
އިސްރާއީލު އަސްކަރިއްޔާގެ އެހީއާއިއެކު އަޤްޞާ އަށް ވަދެގެންއުޅޭއިރު މިހާރުވެސް އިސްރާއީލުން ދަނީ ރާމަﷲގެ އުތުރުގައިވާ ޔުނިވަރސިޓީއަކަށް ވަދެ އެތަނުގައިވާ މުހިއްމު ލިޔެކިޔުންތައް އަތުލައި ޖަރީމާތައް ހިންގަމުންކަން ފާހަގަ ކުރެވެއެވެ.
Advertisement
މީގެ އިތުރުން ހިބްރޫންގެ އެކި އަވަށްތަކާއި ސަލްފިތު ސިޓީއާއި އެނޫންވެސް ގިނަ ތަންތަނުގައި އިސްރާއީލު ހަތިޔާރު އެޅި ސިފައިން ގެންދަނީ ޖަރީމާތައް ހިންގަމުންނެވެ. އަޒް-ޒަވިޔާ ގައި އިސްރާއީލުގެ ބާރުތަކުން ވަނީ ބުލްޑޯޒަރު ބޭނުންކޮށްގެން ދެ ގެއެއް ވެސް ވައްޓާލާފައެވެ. ސަބަބެއް ކަމަށް ބުނީ އެގޭގެ ވެރިފަރާތުން އިސްރާއީލް ސިފައިންނަށް ހަމަލާ ދީފައިވާތީއެވެ.
