މުޅި ރާއްޖޭގެ ވައިގެ ނުސާފުމިންވަރު މިވަގުތު ހުރީ މެދުމިންވަރެއްގައި (މޮޑަރޭޓް ލެވެލްގައި) ކަމަށާއި، ކުރިއަށް އޮތް ދެ ދުވަހު ވެސް މި ހާލަތު ދެމިއޮންނާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން މިއަދު ލަފާކޮށްފިއެވެ.
މެޓް އޮފީހުން މައުލޫމާތު ދިން ގޮތުގައި މި ދުވަސްވަރަކީ އިރުވައި މޫސުމުގެ ދުވަސްވަރު ކަމުން، ހުޅަނގު ފަރާތުން ޖެހެމުންދާ ވައިގެ ސަބަބުން އަވަށްޓެރި އިންޑިއާ މަތިން އަންނަ ނުސާފު ވައިގެ އަސަރު ރާއްޖެއަށް ދަނީ ކުރަމުންނެވެ. ނަމަވެސް، ވައިގެ ހާލަތު އަދި މާ ބޮޑަށް ގޯސްވެފައި ނުވާކަމަށް އެ އިދާރާއިން ހާމަކުރެއެވެ.
ރާއްޖޭގެ އިރުމަތީ ފަރާތުގައި އުފެދިފައިވާ މޫސުމީ ސިސްޓަމެއްގެ ސަބަބުން ވައިގެ ދައުރުވުމަށް ބަދަލުތަކެއް އަންނަމުންދާތީ، މި ހާލަތު އެއްކޮށް ރަނގަޅުވާނެ ސީދާ ދުވަހެއް ލަފާކުރަން އަދި ދަތި ކަމަށް މެޓުން ބުނެއެވެ. އެހެންނަމަވެސް، ކުރިއަށް އޮތް ދެ ދުވަހެއްގެ ތެރޭގައި އެ ސިސްޓަމްގެ ބާރު ދެރަވާނެ ކަމަށް ބެލެވޭތީ، މެޓް އިދާރާއިން ދަނީ މޫސުމަށް އަންނަ ބަދަލުތައް ވަރަށް ގާތުން މޮނީޓަރު ކުރަމުންނެވެ. އަދި ސިސްޓަމްގެ ބާރު ދެރަވުމާއެކު ވައިގެ ދުވެއްޔަށާއި ޖައްވުގެ ހާލަތަށް ބޮޑެތި ބަދަލުތަކެއް އަންނާނެ ކަމަށް ވެސް ވަނީ ލަފާކޮށްފައެވެ.
އެއާ ކޮލިޓީ އިންޑެކްސް (ވައިގެ ސާފުމިން ބަލާ މިންގަނޑު) 50 އިން މަތީގައި ހުރި ނަމަ އެއީ މޮޑަރޭޓް ލެވެލް ނުވަތަ މެދުމިންވަރެއް ކަމުގައިވީ ނަމަވެސް، އެއީ ވެސް ރައްކާތެރިކަމުގެ ފިޔަވަޅުތައް އަޅަންޖެހޭ ހާލަތެއް ކަމަށް މެޓުން ފާހަގަކުރެއެވެ.
މީގެއިތުރުން، އެއާ ކޮލިޓީ އިންޑެކްސް 100 އަށް ވުރެ މަތިވެއްޖެ ނަމަ ނޭވާލާ ނިޒާމުގެ ބަލިތައް ހުންނަ ފަރާތްތަކާއި ހިރާސް ބޮޑު މީހުންނަށް ނުރައްކާ ބޮޑުވާނެ ކަމަށާއި، އަދި އިންޑެކްސް 150 އަށް ވުރެ މަތިވެއްޖެ ނަމަ އެއީ އެންމެންނަށްވެސް އޭގެ ނުރައްކާ އޮތް ހާލަތެއް ކަމަށް މޫސުމާ ބެހޭ ގައުމީ އިދާރާއިން ވަނީ ހަނދާންކޮށްދީފައެވެ.









