ބޭ އޮފް ބެންގޯލްގައި އުފެދިފައިވާ ކޮޅިގަނޑެއް ހޯމަ ދުވަހުގެ ވަގުތެއްގައި ތޫފާނަކަށް ބަދަލުވާނެ ކަމަށް ލަފާކުރެވޭ ކަމަށާއި، އެހެންކަމުން ރާއްޖޭގެ މޫސުން ގޯސްވާނެތީ މޫސުމަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށް މޫސުމާ ބެހޭ ގައުމީ އިދާރާއިން އިލްތިމާސްކޮށްފިއެވެ.
މިހާރު ރާއްޖެއަށް ކުރަމުންދާ ވިއްސާރައާއި ގުޅޭގޮތުން މައުލޫމާތު ދެއްވަމުން މޫސުމާ ބެހޭ ގައުމީ އިދާރާގެ މީޓިއޮރޮލޮޖިސްޓް ތަހުމީނާ އަބްދުލްކަރީމް ވިދާޅުވީ، މި ތޫފާނުގެ ސަބަބުން ރާއްޖޭގެ އެކި ސަރަހައްދުތަކުގައި ފެންބޮޑުވުން އެކަށީގެންވާ ކަމަށެވެ.
ބޭ އޮފް ބެންގޯލުގައި އުފެދޭނެކަމަށް ބެލެވޭ ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވެނީ، އުތުރާއި މެދު ރާއްޖެތެރެއަށްކަމަށް އެ އިދާރާއިން ހާމަކުރިއެވެ. މިދުވަސްވަރު މޫސުން އިތުރަށް ގޯސްވަމުން ދަނީ އެލްނީނޯގެ ބާރު ގަދަވުމުގެ ސަބަބުން ކަމަށާއި، އެލްނީނޯ އެންމެ ބާރުގަދަވާނީ ޑިސެމްބަރު މަހުގެ ތެރޭގައި ކަމަށް މެޓް އޮފީހުން ލަފާކުރިއެވެ.
ރާއްޖޭގެ އުތުރުގެ ރަށްރަށަށް މިއަދު ކުރި ވިއްސާރައިގައި ބައެއް ރަށްރަށުގައި ވަނީ ފެންބޮޑުވެފައެވެ. އޭގެތެރޭގައި ޅ. އަތޮޅާއި ކ. އަތޮޅުގެ ބައެއް ރަށްތައް ހިމެނޭކަން ކަމާބެހޭ އިދާރާތަކުން ފާހަގަކުރެއްވިއެވެ. މި ވިއްސާރައިގައި ބައެއް ރަށްރަށުގެ ގެތަކަށް ފެންވަދެ، އެކިވަރުގެ ގެއްލުންތައް ލިބިފަވާކަމުގައި އެ އިދާރާއިން ހާމަކުރިއެވެ.
މެޓް އޮފީހުން، އާދިއްތަ ދުވަހުގެ މެންދުރު 14:00 އިން ފެށިގެން 18:00 އާ ހަމައަށް ށ. އަތޮޅުން ފެށިގެން އދ. އާއި ހަމައަށް މޫސުން ގޯސްވާނެ ކަމަށް ލަފާކޮށް، ރީނދޫ ސަމާލު ނެރެފަވެއެވެ. މެޓް އޮފީހުން ވިދާޅުވީ، ކުރިޔަށް އޮތް ވަގުތުތަކުގައި ރާއްޖޭގެ ބޮޑު ބަޔަކަށް ވިއްސާރަ ކުރުމާއެކު ގުގުރާނެ ކަމަށް ލަފާކުރެވޭ ކަމަށާއި، ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ.
ކަނޑުތަކުގެ ހާލަތަށް ބަލާއިރު، ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި، ރާޅުގެ އުސްމިން ހުންނާނީ 3 ފޫޓާއި 6 ފޫޓާއި ދެމެދުގައި ކަމަށް ލަފާކުރެވޭ ކަމަށް މެޓް އޮފީހުން މައުލޫމާތުދެއެވެ. އެހެންކަމުން ކަނޑުދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް އިލްތިމާސްކުރިއެވެ.
ވައި ޖެހޭނެ ކަމަށް ލަފާކުރެވެނީ، ހުޅަނގު ދެކުނާއި ހުޅަނގުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް އެ އިދާރާއިން މައުލޫމާތު ދެއްވައެވެ. އެހެންކަމުން ހުރިހާ ފަރާތްތަކުންވެސް މޫސުމަށް ހާއްސަ ސަމާކަމެއްދީ ރައްކާތެރިކަމުގެ ފިޔަވަޅުތައް އެޅުމަށް މޫސުމާ ބެހޭ ގައުމީ އިދާރާއިން އިލްތިމާސް ކުރައްވައެވެ.








