ރަޝިޔާއާއެކު ކުރަމުންދާ ހަނގުރާމަ އިތުރަށް ހޫނުވެފައިވާ ދަނޑިވަޅެއްގައި، ހަނގުރާމަ ނިމުމަކަށް ގެނެސް ސުލްހަ ގާއިމުކުރުމާ ބެހޭގޮތުން ޔޫކްރެއިނުން އެމެރިކާއާއި ޔޫރަޕްގެ އިސް މަންދޫބުންނާއެކު މުހިންމު މަޝްވަރާތަކެއް ބާއްވައިފިއެވެ. އެކުވެރި އަރަބި އިމާރާތުގެ ވެރިރަށް އަބޫދާބީގައި ކުރިއަށްދިޔަ މި ބައްދަލުވުންތަކުގައި، އެމެރިކާގެ ޚާއްޞަ މަންދޫބުން ކަމަށްވާ ސްޓީވް ވިޓްކޯފް އާއި ޖެރެޑް ކުޝްނާގެ އިތުރުން އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް އަދި އިޓަލީގެ އިސް އޮފިޝަލުން ބައިވެރިވެވަޑައިގެންނެވިއެވެ.

މި މަޝްވަރާތަކުގެ މައިގަނޑު އަމާޒަކީ، ރަޝިޔާއާއެކު ބާއްވާ ސުލްހައިގެ ވާހަކަތަކުގައި ޔޫކްރެއިނާއި ޔޫރަޕްގެ ސަލާމަތީ ކަންބޮޑުވުންތަކަށް ޙައްލެއް ހޯދޭނެ އެއްބަސްވުމެއްގެ އޮނިގަނޑު އެކުލަވާލުމެވެ. ޚާއްޞަކޮށް ހަނގުރާމަ ހުއްޓާލުމަށްފަހު ޔޫކްރެއިނަށް ދޭނެ ސަލާމަތީ ގެރެންޓީތަކާއި، ރަޝިޔާއިން ހިފާފައިވާ ބިންތަކުގެ މައްސަލައިގައި ގެންގުޅޭނެ އުސޫލުތަކާ މެދު ފުޅާ ދާއިރާއެއްގައި ވަނީ ޚިޔާލު ބަދަލުކުރެވިފައެވެ.

މި ބައްދަލުވުންތައް ބާއްވާފައިމިވަނީ، ރަޝިޔާއިން ޔޫކްރެއިންގެ ހަކަތައިގެ މަރުކަޒުތަކަށް ދެމުންދާ ހަމަލާތައް ވަރުގަދަކޮށް، އަދި ޔޫކްރެއިންގެ ޑްރޯން ހަމަލާތަކުގެ ސަބަބުން މޮސްކޯގެ އެއާޕޯޓްތައް ބަންދުކުރަން ޖެހިފައިވާ ދަނޑިވަޅެއްގައެވެ. އެމެރިކާގެ މަންދޫބުން ވަނީ މި މަޝްވަރާތަކަށްފަހު މޮސްކޯއަށް ވަޑައިގެން ރަޝިޔާގެ ރައީސް ވްލަޑިމިއާ ޕޫޓިންއާ ވެސް ބައްދަލުކުރައްވާފައެވެ.