ހޮލީވުޑްގެ މަޝްހޫރު އެކްޓަރު ޖޯނީ ޑެޕް ބޮޑު ސްޓޫޑިއޯ ފިލްމަކުން އަލުން އެނބުރި އައުމަށް ތައްޔާރުވެއްޖެއެވެ. އޭނާ މުހިންމު ރޯލަކުން ފެނިގެންދާނީ ޗާލްސް ޑިކެންސްގެ މަޝްހޫރު ވާހަކަ "އަ ކްރިސްމަސް ކެރޯލް" ގެ މައްޗަށް ބިނާކޮށް ޕެރަމައުންޓް ޕިކްޗާސްއިން އުފައްދާ އާ ފިލްމު "އެބެނީޒާ" އިންނެވެ.
މި ފިލްމުގައި ޖޯނީ ޑެޕް އަދާކުރަނީ މައިގަނޑު ޝަހުސިއްޔަތު ކަމަށްވާ އެބެނީޒާ ސްކްރޫޖްގެ ރޯލެވެ. އޭނާއާއެކު މި ފިލްމުން އިއަން މެކެލަން، ރުޕަޓް ގްރިންޓް އަދި ޑެއިޒީ ރިޑްލީ ފަދަ މަޝްހޫރު ތަރިން ފެނިގެންދާނެއެވެ. ފިލްމުގެ ޕްރޮމޯޝަންތަކުގައިވެސް ޑެޕް ހޮލީވުޑަށް އެނބުރި އައުމަށް ބޮޑު އިސްކަމެއް ދީފައިވާއިރު، ފިލްމުގެ ފުރަތަމަ ޓްރެއިލާގައި އޭނާގެ އެންމެ މަޝްހޫރު ފިލްމުތައް ކަމަށްވާ "ޕައިރޭޓްސް އޮފް ދަ ކެރީބިއަން"، "އެޑްވާޑް ސިޒަހޭންޑްސް" އަދި "އެލިސް އިން ވޮންޑަލޭންޑް" އަށް އިޝާރާތްކޮށްފައިވެއެވެ.
އެމްބާ ހާޑާއެކު ހިނގި ޝަރުއީ މައްސަލަތަކާ ގުޅިގެން ޑެޕްގެ ފިލްމީ ކެރިއަރަށް ބޮޑެތި ހުރަސްތަކެއް ކުރިމަތިވިއެވެ. އެގޮތުން 2020 ވަނަ އަހަރު އިނގިރޭސިވިލާތުގެ ނޫހެއް ކަމަށްވާ "ދަ ސަން" އާ ދެކޮޅަށް ކުރި އަބުރުގެ ދައުވާ ނާކާމިޔާބުވުމުން، "ފެންޓާސްޓިކް ބީސްޓްސް" ފިލްމު ސީރީޒުން އޭނާ ވަކިކުރިއެވެ. ނަމަވެސް 2022 ވަނަ އަހަރު އެމެރިކާގައި ހާޑާ ދެކޮޅަށް ކުރި އަބުރުގެ ދައުވާގައި ޖޫރީން ނިންމީ ޑެޕްއާ އެއްކޮޅަށެވެ.
Advertisement
ފިލްމީ ދާއިރާގެ ތަޖުރިބާކާރުން ދެކޭގޮތުގައި "އެބެނީޒާ" އަކީ ހޮލީވުޑްގެ މައި ސްޓްރީމުގައި ޑެޕްގެ މަގާމު އަލުން ވަރުގަދަކުރުމަށް ލިބޭ މުހިންމު ފުރުސަތެކެވެ.
މީގެ އިތުރުން، ޕްރޮޑިއުސަރު ޖެރީ ބްރަކްހައިމާ ވަނީ "ޕައިރޭޓްސް އޮފް ދަ ކެރީބިއަން" ގެ އާ ފިލްމެއް އުފެއްދުމުގެ މަސައްކަތް ކުރިއަށްދާ ކަމަށާއި، އޭގައި ކެޕްޓަން ޖެކް ސްޕެރޯގެ ރޯލުން އަލުން ޑެޕް ފެނުމުގެ ފުރުސަތު އެބައޮތް ކަމަށް އިޝާރާތްކޮށްފައެވެ. އަދި އަންނަ އަހަރުގެ މާރިޗު މަހު ރިލީޒްކުރުމަށް ހަމަޖެހިފައިވާ "ޑޭ ޑްރިންކާ" ކިޔާ ފިލްމަކުން ޕެނެލޮޕީ ކްރޫޒްއާއެކުވެސް ޑެޕް ފެނިގެންދާނެއެވެ.
ފިލްމީ ދާއިރާގެ ފަރާތްތަކުން ބުނާގޮތުގައި، ހޮލީވުޑްގެ އެންމެ އުހުގައި އަލުން ފައިތިލަ ސާބިތުކުރުމުގެ ގާބިލުކަން ޖޯނީ ޑެޕްގެ ކިބައިގައި ހުރި މިންވަރު "އެބެނީޒާ" ގެ ކާމިޔާބީން ވަރަށް ބޮޑަށް ސާފުވެގެންދާނެއެވެ.
