މަޝްހޫރު ލަވަކިޔުންތެރިޔާ ޓޭއިލާ ސުވިފްޓާއި އެމެރިކަން ފުޓްބޯޅަ ތަރި ޓްރެވިސް ކެލްސީ އިއްޔެ ކައިވެނިކޮށްފި އެވެ. ޕީޕަލް މެގަޒިންއިން ރިޕޯޓްކޮށްފައިވާ ގޮތުގައި މި ދެ ތަރިންގެ ކައިވެނީގެ ކަންކަން ކުރިއަށްދިޔައީ ނިއުޔޯކް ސިޓީގެ މަޝްހޫރު މެޑިސަން ސްކޮޔާ ގާޑަންގައެވެ.
ޓޭއިލާގެ މަންދޫބަކު މި ކައިވެނީގެ ހަބަރު ކަށަވަރުކޮށްދީފައިވާއިރު، މި ހަފްލާއަކީ ވަރަށް ކުލަގަދަ އަދި ޝާހީ ހަފްލާއެކެވެ. ކައިވެނީގެ ހަފްލާއަށް ދެ ތަރިންގެ ހެދުންތައް ތައްޔާރުކޮށްފައިވަނީ މަޝްހޫރު ބްރޭންޑެއް ކަމަށްވާ "ކްރިސްޓިއަން ޑިއޯ ހޯޓް ކޫޗާ" އިންނެވެ. މިއީ ޑިއޯގެ ކްރިއޭޓިވް ޑިރެކްޓަރު ޖޮނަތަން އެންޑަސަން، ދެ ތަރިންނާ ގާތުން މަސައްކަތްކޮށްގެން ތައްޔާރުކުރި ހާއްސަ ޑިޒައިނެކެވެ. މިއީ ދުނިޔޭގެ މަޝްހޫރު ސެލެބްރިޓީއަކަށް ޖޮނަތަން އެންޑަސަން ތައްޔާރުކޮށްދިން ފުރަތަމަ ކޫޗާ ވެޑިން ޑްރެސްކަން ފާހަގަކޮށްލެވެ އެވެ.
މި ކައިވެނީގެ ހަފްލާގައި ދުނިޔޭގެ އެކި ދާއިރާތަކުން ފާހަގަކޮށްލެވޭ ގިނަ އަދަދެއްގެ ސެލެބްރިޓީން ބައިވެރިވި އެވެ. އޭގެ ތެރޭގައި ޓޭއިލާގެ އެންމެ ގާތް އެކުވެރިޔާ ސެލީނާ ގޯމޭޒްގެ އިތުރުން، ގީގީ ހަދީދު، ބްރެޑްލީ ކޫޕާ، އެޑް ޝީރަން، އެލީ ގޯލްޑިން އަދި ޖިމީ ފެލޮން ފަދަ ތަރިން ހިމެނެއެވެ. އަދި ހޫ ގްރާންޓް، ކާލީ ކްލޮސް އަދި ޓޮމީ ހިލްފިގާ ފަދަ މަޝްހޫރު ފަރާތްތައް ވެސް މި ހަފްލާއިން ފެނިފައިވެ އެވެ.
Advertisement
ކައިވެނީގެ މައި ހަފްލާގެ ކުރިންވެސް، ދެ ތަރިންގެ ގާތް މީހުންނާއި އާއިލާއަށް ހާއްސަކޮށްގެން ތަފާތު އިވެންޓްތަކެއް ބާއްވާފައިވާ ކަމަށް ރިޕޯޓްތައް ބުނެ އެވެ.
ޓޭއިލާ ސުވިފްޓާއި ޓްރެވިސް ކެލްސީގެ ލޯބީގެ ގުޅުން ފެށުނީ 2023 ވަނަ އަހަރުގެ ހޫނު މޫސުމުގައެވެ. އޭގެ ފަހުން ޓްރެވިސްގެ މެޗުތަކުން ޓޭއިލާ ގަވާއިދުން ފެންނަމުންދިޔައިރު، ޓޭއިލާގެ "އެރާސް ޓުއާ" ގެ ބައެއް ޝޯތަކުގައި ޓްރެވިސް ވެސް ބައިވެރިވެފައިވެއެވެ. މި ދެ ތަރިން އެންގޭޖްވިކަން ރަސްމީކޮށް އިއުލާންކުރީ 2025 ވަނަ އަހަރުގެ އޮގަސްޓް މަހު އިންސްޓަގްރާމް މެދުވެރިކޮށެވެ.
