ފެޑަރަލް ރިޕަބްލިކް އޮފް ބްރެޒިލްގައި ބޭއްވި ޢާންމު އިންތިހާބު ކާމިޔާބު ކުރައްވައި، އެގައުމުގެ ރައީސްކަމަށް އިންތިހާބުވެވަޑައިގެންނެވި ލުއިޒް އިނާސިއޯ ލޫލާ ޑަ ސިލްވާއަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަހުނިޔާގެ މެސެޖެއް ފޮނުއްވައިފިއެވެ.
ދިވެހި ސަރުކާރާއި ދިވެހި ރައްޔިތުންގެ ނަމުގައި ފޮނުއްވި މި މެސެޖުގައި ރައީސް ވަނީ، މި އިންތިހާބުގައި ރައީސް ޑަސިލްވާއަށް ލިބިވަޑައިގެންނެވި ބޮޑު ކާމިޔާބީއަކީ އެމަނިކުފާނުގެ ޒައާމަތަށާއި ގާބިލުކަމަށް ބްރެޒިލްގެ ރައްޔިތުންގެ މެދުގައި އޮތް ބޮޑު އިތުބާރެއް ހާމަވެގެންދިޔަ ކަމެއްކަން ފާހަގަކުރައްވާފައެވެ.
އަދި ބްރެޒިލްގެ ރައްޔިތުންނަށް ރައީސް ޑަސިލްވާ ކޮށްދެއްވަމުން ގެންދަވާ ހިދުމަތްތަކުގެ އަގުވަޒަންކުރައްވައި، އެމަނިކުފާނުގެ ކުރިއަށް އޮތް ރިޔާސީ ދައުރުގައި އިތުރު ކާމިޔާބީއާއި ކުރިއެރުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.
Advertisement
މީގެއިތުރުން، ރައީސް ޑަސިލްވާއަށް ފުރިހަމަ ސިއްހަތާއި އުފާވެރިކަމަށް އެދިވަޑައިގަންނަވަމުން، ބްރެޒިލްގެ އާންމު ރައްޔިތުންނަށް ފާގަތި، ދެމެހެއްޓެނިވި މުސްތަގުބަލަކަށް ރައީސުލްޖުމްހޫރިއްޔާގެ މެސެޖުގައި އެދިވަޑައިގެންފައިވެއެވެ.
