މާލެ ސަރަޙައްދުގައި ގްރޭޑް 10 ގައި ކިޔަވާ 4000 އަށްވުރެ ގިނަ ދަރިވަރުން ތެލެސީމިއާއަށް ސްކްރީންކޮށްފިއެވެ.

މި ދަރިވަރުން ތެލެސީމިއާއަށް ސްކްރީންކޮށްފައި މިވަނީ ތެލެސީމިއާއަށް ހޭލުންތެރިކަން އިތުރުކުރުމަށް ސަރުކާރުން މި އަހަރު ފެށި ޕްރޮގްރާމްގެ ދަށުންނެވެ.

މި ޕްރޮގްރާމް މިހާރު ނިންމާލާފައިވާއިރު ހެލްތު މިނިސްޓްރީން ބުނީ ގްރޭޑް 10 ނިމުމުގެ ކުރިން ތެލެސީމިއާއަށް ސްކްރީނިންގ ކުރަންޖެހޭނެ ކަމަށް ސަރުކާރުން ނިންމި ނިންމުމާ ގުޅިގެން ފުރަތަމަ މަރުޙަލާގެ ތެލެސީމިއާ ސްކްރީނިންގ ކުރުމާއި، ތެލެސީމިއާއަށް ހޭލުންތެރިކުރުން ގްރޭޓަރ މާލެ ސަރަޙައްދުގައި ނިންމާލިއިރު 4000 އަށްވުރެ ގިނަ ދަރިވަރުން ސްކްރީންކޮށްފައިވާ ކަމަށެވެ. އަދި އަތޮޅު ތެރޭގައި މިހާތަނަަށް 76 ދަރިވަރުން ތެލެސީމިއާއަށް ސްކްރީންކޮށްފައިވާކަމަށް ހެލްތު މިނިސްޓްރީން ބުންޏެވެ.

މީގެ އިތުރުން މާލެ ސަރަޙައްދުގެ ސްކޫލްތަކުގެ ގްރޭޑް 10ގެ 124 ބެލެނިވެރިން އަދި 198 ދަރިވަރުންނަށް ތެލެސީމިއާއަށް ހޭލުންތެރިކުުރުމުގެ މަޢުލޫމާތު ދީފައިވާކަމަށް ހެލްތު މިނިސްޓްރީން ބުންޏެވެ.

މި ޕްރޮގްރާމް ހިންގާފައިވަނީ މޯލްޑިވިއަން ބްލަޑް ސަރވިސަސް، ހެލްތު މިނިސްޓްރީ އަދި އެޑިއުކޭޝަން މިނިސްޓްރީ ގުޅިގެންނެވެ.