ތެލަސީމިއާ ކުދިންނަށް ކުނިވެފައި ނުވަތަ ތަގައްޔަރުވެފައިވާ ލޭ އަޅާފައިވާ ކަމަށް ބުނެ ބައެއް މީޑިއާތަކާއި މަންސަތަކުގައި ފަތުރަމުންދާ ހަބަރުތަކަކީ ދޮގު ހަބަރުތަކެއް ކަމަށް މޯލްޑިވިއަން ބްލަޑް ސާވިސަސް (އެމް.ބީ.އެސް) އިން ބުނެފި އެވެ.
މިކަމާ ގުޅިގެން އެމް.ބީ.އެސް އިން ނެރުނު ނޫސް ބަޔާނެއްގައި ބުނެފައިވަނީ، 19 އޭޕްރިލް 2026 ވާ އާދީއްތަ ދުވަހުގެ ރޭ 21:00 ގައި ހިދުމަތް ނިންމައި މަރުކަޒު ބަންދުކުރި ފަހުން، ލޭ ރައްކާކުރާ ފްރީޒަރަކަށް ޓެކްނިކަލް މައްސަލައެއް ދިމާވި ކަމަށެވެ. މި މައްސަލަ ފާހަގަކުރެވުނީ އެރޭ 23:21 ހާއިރު ފްރީޒަރުގެ ފިނިހޫނުމިން މޮނިޓާ ކުރާ އެލާޓް ސިސްޓަމުން މެސެޖް ލިބުމާ ގުޅިގެންނެވެ.
އެލާޓް ލިބުމާއެކު އެމް.ބީ.އެސްގެ ތިން މުވައްޒަފަކު ވަގުތުން މަރުކަޒަށް ހާޒިރުވެ، ފްރީޒަރުގައި ހުރި 12 ލޭ ޕެކެޓް ވަނީ ސްޓޭންޑް-ބައި ފްރީޒަރަކަށް ބަދަލުކޮށްފަ އެވެ. އެމް.ބީ.އެސް އިން ހާމަކުރި ގޮތުގައި، ފްރީޒަރުގެ ފިނިހޫނުމިން 11 ޑިގްރީ ސެލްސިއަސްއަށް އަރާފައިވީ ނަމަވެސް، ސިއްހީ މިންގަނޑުތަކަށް ބަލާއިރު 10 ޑިގްރީ ސެލްސިއަސްއަށް ވުރެ މަތިނުވާ ގޮތަށް 24 ގަޑިއިރު ވަންދެން ލޭ ރައްކާތެރިކަމާއެކު ބެހެއްޓޭނެ އެވެ. އެހެންކަމުން، އެ ދުވަހު އަޅާފައިވާ ލެޔަކީ ކުނިވެފައި ނުވަތަ ތަގައްޔަރުވެފައިވާ ލެޔެއް ނޫންކަމުގެ ފުރިހަމަ ޔަގީންކަން އެ އިދާރާއިން އަރުވަ އެވެ.
ނަމަވެސް، މި ހާދިސާއާ ގުޅިގެން އިދާރީ ގޮތުން ބަލަންޖެހޭ ކަންކަން ބަލަމުން ދަނިކޮށް، އޭޕްރިލް 20 ވީ ހޯމަ ދުވަހުގެ ހެނދުނު، ތެލަސީމިއާ ސެންޓަރުގައި ތިބި ތިން މީހަކަށް އެ ލޭ އަޅާފައިވާކަން ހެނދުނު 09:30 ހާއިރު ވަނީ ފާހަގަކުރެވިފަ އެވެ. އެމް.ބީ.އެސް އިން ބުނީ ލޭ އަޅާފައިވަނީ އެކަން ފާހަގަވުމުގެ ކުރިން ކަމަށާއި، އެކަން އެނގުމާއެކު އެ ފަރާތްތަކަށް އެ މައުލޫމާތު ހިއްސާކޮށްފައިވާ ކަމަށެވެ.
މި ކަމުގައި އިހުމާލެއް ވެފައިވޭތޯ ބެލުމަށްޓަކައި މާލެ ސިޓީ ގްރޫޕް އޮފް ހޮސްޕިޓަލްސްގެ ފަރާތުން މިހާރު ވަނީ ތަހުގީގު ޓީމެއް އެކުލަވާލައި ތަހުގީގު ފަށާފަ އެވެ. މިގޮތުން، ލޭ އެޅުމުގެ ކުރިން ދޭންޖެހޭ މައުލޫމާތު ދިނުމުގައި އިހުމާލުވި ކަމަށް ތުހުމަތުކުރެވޭ މުވައްޒަފަކު، ތަހުގީގުގެ ބޭނުމަށް 23 އޭޕްރިލް އިން ފެށިގެން އޮފީހަށް ނުކުތުން ވަނީ މަނާކޮށްފަ އެވެ.
މޯލްޑިވިއަން ބްލަޑް ސާވިސަސް އިން އިތުރަށް ބުނީ، މިފަދަ ހާދިސާތަކުގައި ކަންކަން ކުރިއަށްދާނީ ބައިނަލްއަގްވާމީ މިންގަނޑުތަކާ އެއްގޮތަށް ކަމަށާއި، ބަލިމީހުންގެ ރައްކާތެރިކަން ކަށަވަރުކުރުމަކީ އެ އިދާރާގެ އެންމެ އިސް މަގްސަދު ކަމަށެވެ.
