ޔަމަނުގެ ތަޢިއްޒް ގަވަރްނޮރޭޓްގެ ބޮޑު ސަރަހައްދެއް ހިސާރުކޮށްގެން ތިބި އަންޞާރުﷲ (ޙޫޘީ) ޖަމާއަތުގެ ފައުޖުތަކަށް ބޮޑު ނާކާމިޔާބީއަކާއި ކުރިމަތިލާން ޖެހި، ސައުދީ ކޯލިޝަނުގެ ވަރުގަދަ ވައިގެ އެހީތެރިކަމާއެކު ތަޢިޒްގެ ދެކުނުގައިވާ ސްޓްރެޓީޖިކް ދެ ސަރަހައްދެއް ކަމަށްވާ ސަބިރު އަލް-މަވާދިމް އާއި އަލް-ޞަރާރީގެ މުހިންމު މަގާމުތަކެއް ޔަމަނުގެ ސަރުކާރު ފައުޖުތަކުން އަލުން ހިފައިފިއެވެ.
މަސްދަރުތަކުން ރިޕޯޓްކުރާ ގޮތުގައި، މި ކާމިޔާބީ ސަރުކާރު ސިފައިންނަށް ލިބިފައިވަނީ ޙޫޘީން ތަޢިއްޒު ސިޓީ މުޅިން ބަންދުކޮށްގެން ދެމުންދިޔަ ހަމަލާތަކަށް ރައްދުދިނުމުގެ ގޮތުން ޔަމަނު ސަރުކާރުން ފެށި ޚާއްޞަ އަސްކަރީ އޮޕަރޭޝަންގެ ދަށުންނެވެ.
މި ކުރިމަތިލުންތަކުގައި ސައުދީ އަރަބިއްޔާގެ ހަނގުރާމަމަތީ ބޯޓުތަކުން ވަނީ ޙޫޘީންގެ ޓޭންކުތަކަށާއި، މައިދާނުގައި ތިބި ޙޫޘީ ހަނގުރާމަވެރިންނާއި އެމީހުންގެ ގިނަޢަދަދެއްގެ ވެހިކަލްތަކުގެ އިތުރުން މުވާޞަލާތީ ޓަވަރުތަކަށް ވަރުގަދަ ބޮމުގެ ހަމަލާތަކެއްދީ، އެތަންތަން ވެސް މުޅިން ސުންނާފަތިކޮށްލާފައެވެ.
Advertisement
ސަބިރު އަލް-މަވާދިމް އާއި އަލް-ޞަރާރީގެ މައިގަނޑު ސަރަހައްދުތައް ސަރުކާރުގެ ކޮންޓްރޯލްގެ ދަށަށް ދިއުމަކީ ސިޓީގެ ދެކުނު ފަރާތުން ޙޫޘީންގެ ހިސާރު ފޫއަޅުވާލުމަށް ލިބުނު ވަރަށް ބޮޑު ކުރިއެރުމެކެވެ. ނަމަވެސް، މި ހަނގުރާމައިގެ ސަބަބުން ތަޢިއްޒުގެ އެތައް ހާސް އާއިލާތަކެއް ރަށްދޫކޮށް ދާންޖެހިފައިވާއިރު، ސިޓީގެ އެތެރޭގައި ކާބޯތަކެއްޗާއި ބޭހުގެ ދަތިކަން އިންތިހާއަށް ބޮޑުވެ، ބޮޑު އިންސާނީ ކާރިސާއެއް ކުރިމަތިވަމުންދާތީ އދ. އިން ވަނީ ވަގުތުން ފިޔަވަޅު އެޅުމަށް މުޅި ދުނިޔެއަށް ގޮވާލާފައެވެ.
