ދިވެހި ވަތަނީ ހިދުމަތުގެ ފަންނީ ތަމްރީނު ޕްރޮގްރާމުގެ 3 ވަނަ ބެޗުގައި ބައިވެރިވާ 84 ދިވެހި ޒުވާނުން، ތަމްރީނުތައް ފެށުމަށްޓަކައި ބ. ކިހާދޫގައި ގާއިމުކޮށްފައިވާ އެމްއެންޑީއެފް ސުކޫލް އޮފް އިންޖިނިއަރިންގ އެންޑް ލޮޖިސްޓިކްސްއަށް ފުރައިފިއެވެ.
16 ހަފުތާގެ މުއްދަތަށް ކުރިއަށްދާ މި ތަމްރީނު ޕްރޮގްރާމުގައި ރާއްޖޭގެ 17 އަތޮޅެއްގެ 44 ރަށަކަށް ނިސްބަތްވާ 64 ފިރިހެން އަދި 20 އަންހެން ދަރިވަރުން ބައިވެރިވެއެވެ. މި ޕްރޮގްރާމުގައި ބައިވެރިވާ ހުރިހާ ޒުވާނުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކާމިޔާބީއަށް އެދިވަޑައިގެންފައެވެ.
މި ތަމްރީނުގެ ތެރެއިން މެރިން މެކޭނިކް، ރެފްރިޖަރޭޝަން އެންޑް އެއަރ ކޮންޑިޝަނިންގ، ވެލްޑިންގ އެންޑް މެޓަލް ފެބްރިކޭޝަން، އޮޓޯމޯބައިލް އިންޖިނިއަރިންގ، އިލެކްޓްރީޝަން އަދި އޮފީސް މެނޭޖްމަންޓް ހިމެނޭހެން ސެޓްފިކެޓް ލެވެލް 3 ގެ ހަ ކޯހެއް ކުރިއަށްދާނެއެވެ. ފަންނީ ތައުލީމުގެ އިތުރުން ހަށިހެޔޮކަމާއި އަހްލާގީ މިންގަނޑު ހަރުދަނާކުރުމަށް ފިޒިކަލް ފިޓްނަސް، ސްވިމިންގ، ޑްރިލް، އަދި ކުޅިވަރު ހަރަކާތްތަކާއެކު ދިރިއުޅުމުގެ ހުނަރުތަކާއި ލީޑަރޝިޕް ދަސްކޮށްދެވޭނެއެވެ.
Advertisement
މި ޕްރޮގްރާމުގެ މައިގަނޑު މަގްސަދަކީ ވަޒީފާގެ މައިދާނަށް ބޭނުންވާ ފަންނީ ހުނަރުތަކާއެކު، އަމިއްލަ ނަފްސަށް އިތުބާރުކުރާ، އަގީދާ ވަރުގަދަ އަދި ދުޅަހެޔޮ ޒިންމާދާރު ޒުވާން ޖީލެއް ބިނާކުރުމެވެ. ދިވެހި ވަތަނީ ހިދުމަތުގެ ފަންނީ ތަމްރީނު ޕްރޮގްރާމަކީ މަސައްކަތްތެރި ޒުވާނުން ބިނާކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެކަށައަޅުއްވާފައިވާ އިސް ސިޔާސަތުގެ ދަށުން ކުރިއަށްގެންދާ މުހިންމު ގައުމީ ހަރަކާތެކެވެ.
