މެދުއިރުމަތީގެ މަސްރަޙު ނުހަނު ބޮޑަށް ގޯސްވެފައިވާ މި ދަނޑިވަޅުގައި، މައްކާ ދިފާޢީ އެއްބަސްވުމުގެ (މެއްކާ ޑިފެންސް ޕެކްޓް) ކުއްލި ބައްދަލުވުމެއް ސަޢޫދީ ޢަރަބިއްޔާގައި ބޭއްވުމަށް ހަމަޖެހިއްޖެ ކަމަށް ޕާކިސްތާނުގެ ޚާރިޖީ ވަޒީރު އިޢުލާން ކުރައްވައިފިއެވެ.
ޕާކިސްތާނުގެ ޚާރިޖީ ވަޒީރާ ޙަވާލާދީ އަލްޖަޒީރާއިން ރިޕޯޓްކޮށްފައިވާ ގޮތުގައި، މި ކުއްލި ބައްދަލުވުން ބޭއްވުމުގެ މައިގަނޑު މަޤްޞަދަކީ ސަރަޙައްދީ ހަމަޖެހުމާއި، އިސްލާމީ މުޤައްދަސް ބިންތަކުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އެއްބަސްވުމުގެ ބައިވެރިވާ ޤައުމުތަކުގެ މެދުގައި އަވަސް މަޝްވަރާތަކެއް ކުރުމެވެ. މި ބައްދަލުވުން ބޭއްވުމަށް ހަމަޖެހިފައިވަނީ ސަޢޫދީ ޢަރަބިއްޔާގައެވެ.
މި ބައްދަލުވުން މި ބާއްވަނީ މެދުއިރުމަތީގެ ސަލާމަތީ މަސްރަޙު އިންތިހާއަށް ނާޒުކު ފައްތަރަކަށް ގޮސް، ޞަރަޙައްދުގައި ހަނގުރާމައިގެ ނުރައްކާ އިންތިހާއަށް ބޮޑުވެފައިވާ ދަނޑިވަޅެއްގައެވެ. ޚާއްޞަކޮށް ހުރްމުޒް ކަނޑުއޮޅީގެ ސަލާމަތާއި، ތެޔޮ އުފުލާ ބޯޓުފަހަރަށް އަމާޒުވަމުންދާ ޙަމަލާތަކާއި، ބައިނަލްއަޤްވާމީ ބާރުތަކުން ސަރަޙައްދަށް ސިފައިންނާއި އަސްކަރީ ވަސީލަތްތައް ޖަމާކުރަމުންދާ ވަގުތެއްގައެވެ.
Advertisement
މި ކުއްލި ބައްދަލުވުމުގައި އިސްލާމީ ޤައުމުތަކުގެ ސަލާމަތީ އަދި ދިފާޢީ ޙާލަތާ ގުޅޭގޮތުން ފުޅާ ދާއިރާއެއްގައި މަޝްވަރާކޮށް، ސަރަޙައްދުގެ އަމަންއަމާންކަން ދެމެހެއްޓުމަށް އަޅަންޖެހޭ އަވަސް ފިޔަވަޅުތަކާ މެދު ގޮތްތަކެއް ނިންމުމަށް ވަނީ ތާވަލުކުރެވިފައެވެ.
