ދިވެހިރާއްޖޭގެ ކެޕިޓަލް މާކެޓް ފުޅާކޮށް، ދެވަނަ ހިއްސާގެ ބާޒާރެއް ކުރިއަށް ގެންދިއުމަށްޓަކައި ސަރުކާރުގެ 100 އިންސައްތަ ހިއްސާ ހިމެނޭ ގޮތަށް "ނޭޝަނަލް އެކްސްޗޭންޖް ލިމިޓެޑް" ގެ ނަމުގައި ސަރުކާރު ކުންފުންޏެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއްޔެ އުފައްދަވައިފިއެވެ.
ގާނޫނު ނަންބަރު: 2023/7 (ކުންފުނީގެ ގާނޫނު) ގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިހުތިޔާރުގެ ދަށުން، ރައީސުލްޖުމްހޫރިއްޔާގެ ގަރާރަކުން އުފެއްދެވި މި ކުންފުންޏަކީ، ރާއްޖޭގެ އިސްލާމީ މާލީ ދާއިރާއާއި ސަރުކާރުގެ މާލީ ބޭނުންތައް ފުޅާވަމުންދާ ދަނޑިވަޅެއްގައި، މާލީ ބާޒާރު ހަރުދަނާކުރުމަށް އެޅުނު މުހިންމު ފިޔަވަޅެކެވެ.
މި ކުންފުނީގެ މައިގަނޑު މަގުސަދުތަކުގެ ތެރޭގައި ދިވެހިރާއްޖޭގެ ކެޕިޓަލް މާކެޓު ކުރިއަރުވައި، މާކެޓުގެ އިތުބާރާއި ދެފުށް ފެންނަ މިންވަރު އިތުރުކުރުމާއި، ޒަމާނީ ސެކިއުރިޓީޒް އެކްސްޗޭންޖްތަކާއި ޓްރޭޑިންގ ފެސިލިޓީތައް ގާއިމުކޮށް ހިންގުން ހިމެނެއެވެ. އަދި ދައުލަތުގެ ސެކިއުރިޓީޒްއާއި، އިސްލާމީ ޝަރީއާގެ ހަމަތަކަށް ފެތޭ ސުކޫކާއި، އެހެނިހެން މާލީ ވަސީލަތްތައް ނެރުމާއި، ލިސްޓުކުރުމާއި، މުއާމަލާތުކުރުމުގެ ފުރުސަތު ފަހިކޮށްދިނުމުގެ އިތުރުން ސެންޓްރަލް ސެކިއުރިޓީޒް ޑިޕޮސިޓަރީއާއި، ކްލިއަރިންގ އަދި ސެޓްލްމަންޓުގެ ޒަމާނީ ޕޯސްޓް-ޓްރޭޑް ހިދުމަތްތައް ފޯރުކޮށްދިނުން ވެސް މި ކުންފުނީގެ މަގުސަދުތަކުގެ ތެރޭގައި ހިމެނެއެވެ.
Advertisement
މީގެއިތުރުން، ރާއްޖެއާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރުމަކީވެސް މި ކުންފުނީގެ އަމާޒެކެވެ.
