ރަސްމާލޭގައި ޔޫއޭއީގެ އީގަލް ހިލްސް ކުންފުންޏާ ގުޅިގެން ކުރިއަށްގެންދަން ނިންމާފައިވާ ބޮޑު މަޝްރޫއުގެ އެއްބަސްވުމުގައި ޤާނޫނުން ބޭރު އެއްވެސް ކަމެއް ނޯންނާނެ ކަމަށާއި، ބޭރުގެ އިންވެސްޓަރުންނަށް ބިން މިލްކުކޮށް ނުދެވޭނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފި އެވެ.
ދައުލަތުގެ މީޑިއާ،ގެ "ނޭޝަން ޗެޓް" ޕްރޮގްރާމުގައި ވާހަކަފުޅުދައްކަވަމުން ރައީސް ވިދާޅުވީ، ސިޔާސީ ވިސްނުމުގައި ތަސައްވަރު އޮޅޭގޮތަށް ރަސްމާލެއާ ގުޅޭގޮތުން ވާހަކަދައްކަނީ ރައްޔިތުންނަށް ފައިދާވާ މިފަދަ ބޮޑެތި މަޝްރޫއުތައް ރާއްޖެއަށް ގެނައުމަށް ހުރަސްއެޅުމުގެ ބޭނުމުގައި ކަމަށެވެ. އަދި ރަސްމާލެ ތަރައްގީކުރުމަށް ސަރުކާރުން ގެންގުޅޭ ތަސައްވަރަށް އީގަލް ހިލްސް މަޝްރޫއާއެކު އެއްވެސް ބަދަލެއް ނާންނަކަމަށާއި، މިއީ ރައްޔިތުންގެ އުއްމީދުތައް ފުރިހަމައަށް ހާސިލުވާނެ މަޝްރޫއެއް ކަމަށްވެސް އެމަނިކުފާނު ވިދާޅުވި އެވެ.
ރައީސް ވިދާޅުވީ ރައްޔިތުންނަށް ފައިދާވާ ކަންކަން ކުރިއަށްގެންދާއިރު އެއަށް ފާޑުކިޔަނީ ގައުމު އިސްކުރުމުގެ ވިސްނުން ނެތުމުން ކަމަށާއި، މިއީ ހިތާމަވެރި ނަމަވެސް މިއަދުގެ ޙަގީގަތް ކަމަށެވެ. އަދި ތިމާއަކީ ފުރަތަމަ ދިވެހި ރައްޔިތެއްކަން ހަނދާންނެތޭ މިންވަރަށް ބައެއް ސިޔާސީ ފަރާތްތަކުން ވިސްނުން ގެންގުޅޭކަން އެމަނިކުފާނު ފާހަގަކުރެއްވި އެވެ.
Advertisement
ރާއްޖޭގެ ސިޔާސީ އޮއިވަރުގައި ފެށުނީއްސުރެ މިފަދަ ކަންކަން ހިނގަމުންދާކަން ފާހަގަކުރައްވައި ރައީސް ވިދާޅުވީ، ލިޔާ އެއްޗަކުން ނުވަތަ ދައްކާ ވާހަކައަކުން ޒިންމާދާރުކަން ކުޑަކޮށް ގައުމަށް ނުވިސްނައި އަމަލުކޮށްފިނަމަ އޭގެ ނުރަނގަޅު އަސަރު މުޅި ގައުމަށް ކުރާނެ ކަމަށެވެ. ރަސްމާލެއަށް އަންނަ މި ބޮޑު މަޝްރޫއުގެ ސަބަބުން އިގްދިސާދީ، އުމްރާނީ އަދި އިޖުތިމާއީ ގޮތުން ބޮޑެތި ކުރިއެރުންތަކެއް ލިބޭނެ ނަމަވެސް، މި މަޝްރޫއާ ގުޅުވައިގެން ޒިންމާދާރުކަން ކުޑަ ވާހަކަތައް ފަތުރަމުންދާ ކަމަށް ރައީސް ވިދާޅުވި އެވެ.
"ބިން ވިއްކައިފިއޭ، މިލްކުކޮށްދީފިއޭ ކިޔަނީ. މިއީ ރާއްޖޭގެ ޤާނޫނުއަސާސީން މަނާކަމެއް. ޤާނޫނުއަސާސީއާ ހިލާފަށް އެއްވެސް ކަމެއް ނޯންނާނެ. އެއްވެސް މަޝްރޫޢެއް ނުވަތަ އިންވެސްޓްމަންޓެއްވެސް ނުގެންދާނަން. އަޅުގަނޑަށް މުހިންމީ ގައުމާއި ރައްޔިތުން. ބިން މިލްކުވާކަށް ފުރުސަތެއް ނުދޭނަން. އެގޮތަށް ރާވާފައިވެސްވަނީ."
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް ވިދާޅުވީ އީގަލް ހިލްސްއާއެކު އެއްބަސްވުންތައް ގާއިމުކުރަނީ މިހާރުވެސް އަމަލުކުރަމުންދާ އުސޫލުތަކުގެ ތެރެއިން ކަމަށެވެ. އެގޮތުން ސޮވްރިން ގެރެންޓީ ދިނުމާއި، ސަރުކާރުން ލޯނު ނެގުމާއި، ޓެކްސް ކޮންސެޝަން ނުވަތަ ޑިއުޓީ އެގްޒެމްޕްޝަން ފަދަ ގަވާއިދުން ބޭރު އެއްވެސް ލުޔެއް ނުވަތަ އިނާޔަތެއް ނޯންނާނެ ކަމަށާއި، ބިން ދޫކުރަނީ ހަމައެކަނި ކުއްޔަށް ނުވަތަ ލީސް އުސޫލުން ކަމަށް އެމަނިކުފާނު ސާފުކޮށްދެއްވި އެވެ. އަދި މިކަމުގެ ސަބަބުން ރައްޔިތުންނަށް ދިނުމަށް ކަނޑައަޅާފައިވާ ގޯތިތަކަށް އެއްވެސް ބަދަލެއް ނާންނާނެ ކަމަށްވެސް ރައީސް ވިދާޅުވިއެވެ.
ރަސްމާލެ މަޝްރޫއުގެ އަމަލީ މަސައްކަތްތަކުގެ ތަފްސީލު ހިއްސާކުރައްވަމުން ރައީސް ވިދާޅުވީ، އެ މަޝްރޫއުގެ ބިން ހިއްކުމުގެ 60 އިންސައްތައާއި 70 އިންސައްތައާ ދެމެދުގެ ބޮޑުބައެއް މިހާރު ނިފައިވާކަމަށެވެ. އަދި މި މަޝްރޫއުގެ ސަބަބުން ރާއްޖޭގެ ޖީޑީޕީ މަތިވެ، ގައުމުގެ އިގްތިސާދަށާއި ރައްޔިތުންނަށް ބޮޑެތި ކުރިއެރުންތަކެއް ލިބިގެންދާނެކަން ފާހަގަކުރައްވައި ރައީސް ވަނީ، މިފަދަ ބޮޑެތި މަޝްރޫއުތަކަށް ކިތަންމެ ހުރަސްއަޅަން އުޅުނު ނަމަވެސް ސަރުކާރުން މި މަޝްރޫއު ކާމިޔާބުކަމާއެކު ކުރިއަށްގެންދަވާނެ ކަމުގެ ޔަގީންކަން ދެއްވާފަ އެވެ.
އީގަލް ހިލްސް ވޯޓަރފްރަންޓް އަދި މެރީނާ ޕްރޮޖެކްޓަކީ 20 ބިލިއަން ޑޮލަރުގެ އަގުހުރި، ދިވެހިރާއްޖޭގެ ތާރީހުގައިވެސް މިހާތަނަށް ހިންގޭ އެންމެ ބިޔަ ފޮރިން އިންވެސްޓްމަންޓް މަޝްރޫއެވެ.
