ރަޝިޔާގެ ރައީސް ވްލަޑިމިއާ ޕޫޓިން ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓުން ނެރުނު އަމުރާއި ހަވާލާދީ، ރަޝިޔާގެ ރައީސް ހައްޔަރުކުރުމަށް ޔޫކްރޭނުން މޮންގޯލިއާގެ ސަރުކާރަށް ގޮވާލައިފިއެވެ. 

2023 ވަނަ އަހަރުގެ މާޗް މަހު ޕޫޓިންއާއި ދެކޮޅަށް ނެރުނު އަމުރުގައި ބުނެފައި ވަނީ ޔޫކްރޭނަށް އަރައިގަތުމުގެ ތެރޭގައި ޔޫކްރޭންގެ ކުދިން ރަޝިޔާއަށް ގަދަކަމުން ގެންގޮސް ހަނގުރާމައިގެ ޖަރީމާތައް ޕޫޓިން ހިންގާފައިވާ ކަމަށެވެ.

އަންގާރަ ދުވަހު މޮންގޯލިއާއަށް ޕޫޓިން ކުރައްވާ ދަތުރުފުޅަކީ އައިސީސީގެ އަމުރު ނެރުނު ފަހުން އައިސީސީގެ މެމްބަރު ގައުމަކަށް ވަޑައިގަންނަވާ ފުރަތަމަ ފަހަރެވެ.

މޮންގޯލިއާ އަކީ އިންޓަނޭޝަނަލް ކްރިމިނަލް ކޯޓް (އައިސީސީ) ގެ މެމްބަރެކެވެ. މާނައަކީ ރަޝިޔާއިން ޔޫކްރޭނަށް އަރައިގަތް ދުވަސްވަރު ހަނގުރާމައިގެ ޖަރީމާތަކާ ގުޅުން ހުރި ތުހުމަތުތަކުގައި އައިސީސީން ހޯދަމުންދާ ރަޝިޔާގެ ރައީސް ވްލަޑިމިއާ ޕޫޓިން ހައްޔަރުކުރުމުގެ އަމުރު ހިމެނޭ ގޮތަށް އައިސީސީގެ އަމުރުތަކަށް އަމަލުކުރުން މޮންގޯލިއާއަށް ގާނޫނީ ގޮތުން ލާޒިމްވެ އެވެ. މިހެން ކަންތައް ދިމާވި ނަމަވެސް ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވަނީ ކުރިއަށް އޮތް ދަތުރުފުޅުގައި މޮންގޯލިއާ އިން ޕޫޓިން ހައްޔަރުކުރުމާ މެދު "އެއްވެސް ކަންބޮޑުވުމެއް" ނެތް ކަމަށް ވިދާޅުވެފައެވެ

ރަޝިޔާއިން އައިސީސީގެ އިޚްތިޞާޞް ބަލައިނުގަންނައިރު، މިއީ މޮސްކޯއިން އެތައް ފަހަރަކު ތަކުރާރުކޮށްފައިވާ ނުކުތާއެކެވެ. އެހެންނަމަވެސް، ޔޫކްރޭންގެ ފޮރިން މިނިސްޓްރީން ހުކުރު ދުވަހު މޮންގޯލިއާއަށް އިލްތިމާސްކޮށްފައި ވަނީ ރައީސް ޕޫޓިން ހައްޔަރު ކުރުމަށެވެ.