ފަލަސްތީނަށް ތާއީދުކުރުމުގެ ސަބަބުން ރެޕް ލަވަކިޔުންތެރިޔާ މެކްލްމޯރ، އެޑް ޝީރަންގެ ޓުއަރއިން ވަކިކޮށްލި މައްސަލައިގައި، ކުޑަކުދިންނަށް އުނގަންނައިދިނުމުގައި މަޝްހޫރު އަދި ޔޫޓިއުބްގެ މަގުބޫލު ތަރި "މިސް ރޭޗަލް"، އެޑް ޝީރަންއަށް ވަރަށް ބޮޑަށް ފާޑުކިޔައިފިއެވެ.
އިންސްޓަގްރާމްގައި ކުރި ޕޯސްޓެއްގައި މިސް ރޭޗަލް ބުނެފައިވަނީ، ފަލަސްތީނުގެ ރައްޔިތުންނަށްޓަކައި އަމިއްލަ ޕްލެޓްފޯމް ބޭނުންކޮށްގެން ވާހަކަދެއްކި ފަންނާނެއްގެ ހައްގުގައި ތެދުވުމުގެ ބަދަލުގައި، އެޑް ޝީރަން ވަނީ ފިއްތުންތަކަށް ބޯލަނބާފައެވެ. އަދި ޣައްޒާގައި ނަސްލު ނައްތާލުމުގެ އަމަލުތައް ހިންގަމުންދާ ކަމަށާއި އެކަމާ ދެކޮޅަށް މީހުން ވާހަކަދައްކަންޖެހޭ ކަމަށްވެސް އޭނާ ބުނެފައިވެއެވެ.
މީގެ އިތުރުން، ފަލަސްތީނުގެ ކުޑަކުދިން މަރަމުންދާ މައްސަލައަށް އަލިއަޅުއްވާލައްވަމުން މިސް ރޭޗަލް ބުނެފައިވަނީ، އެހެން ތަނެއްގައި ހުދު ނަސްލުގެ 20،000 އަށްވުރެ ގިނަ ކުޑަކުދިން މަރާލިނަމަ، ފަންނާނުން ކޮންސެޓް ސްޓޭޖުތަކުން އެ ވާހަކަ ދައްކާނެ ކަމަށެވެ. އަދި ބައެއް ކުދިންގެ ފުރާނައަކީ އަނެއްބައި ކުދިންގެ ފުރާނައަށްވުރެ އަގުކުޑަ އެއްޗެއް ކަމަށް ދެއްކުމަކީ ނަސްލީ ތަފާތުކުރުން ކަމަށް ސިފަކުރައްވަމުން، މިފަދަ ނަސްލު ނައްތައިލުމުގެ އަނިޔާވެރި އަމަލުތަކުގައި ހަނުހުރުމަކީ ނިއުޓްރަލް ވެގެން ހުރެވެން އޮތް ކަމެއް ނޫން ކަމަށް އޭނާ ވަނީ ބުނެފައެވެ.
Advertisement
މެކްލްމޯރ ޓުއަރއިން ވަކިކޮށްފައިވަނީ، ސެޕްޓެމްބަރު 4 ވަނަ ދުވަހު ނިއު ޖަރޒީގައި ބޭއްވި ޝޯއެއްގައި "ފްރީ ޕަލަސްތީން" އޭ ގޮވައި، ފަލަސްތީނަށް ތާއީދުކުރާ "ހިންދްސް ހޯލް" ލަވަ ހުށަހެޅުމާ ގުޅިގެންނެވެ. ޝޯގެ ޕްރޮމޯޓަރުން ބަޔާންކުރި ގޮތުގައި، މެކްލްމޯރ ބައިވެރިވާނަމަ އެއްވެސް ޝޯއެއް ބާއްވަން ބޭނުންނުވާ ކަމަށް ބައެއް ސްޓޭޑިއަމްތަކުން އަންގާފައިވެއެވެ.
މީގެ ކުރިންވެސް ޣައްޒާގެ ކުޑަކުދިންނަށްޓަކައި އަޑުއުފުލާފައިވާ މިސް ރޭޗަލްގެ މި ބަސްތަކާއެކު، މެކްލްމޯރ ދިފާއުކޮށް ވާހަކަދައްކާ ފަންނާނުންގެ ނުފޫޒުގަދަ އަޑުތަކަށް ވަނީ އިތުރު ބާރެއް ލިބިގެންގޮސްފައެވެ.
