އޭ.އައި އަދި އޮޓޮމޭޝަންގެ ސަބަބުން އިންސާނުންގެ ވަޒީފާތައް ގެއްލިދިއުމުގެ ބިރު ބޮޑުވެފައިވާތީ، ވަޒީފާތައް ހިމާޔަތްކުރުމަށްޓަކައި ހަރުދަނާ ގަވާއިދުތަކެއް ހެދުމަށް ގޮވާލައި ޕޮލެންޑުގެ ވެރިރަށް ވާރސޯގައި ހުންނަ އެ ގައުމުގެ ޑިޖިޓަލް އެފެއާޒް މިނިސްޓްރީ ބޭރުގައި ރޮބޮޓްތަކެއް އެއްވެ މުޒާހަރާކޮށްފިއެވެ.

ޑިމޮކްރެޓިޒަމް އިނިޝިއޭޓިވް އިން އިންތިޒާމުކޮށްގެން ކުރިއަށް ގެންދިޔަ މި ތަފާތު ހަރަކާތުގައި ހިއުމަނޮއިޑް ރޮބޮޓްތަކާއި، ރޮބޮޓް ކުއްތާތަކުގެ އިތުރުން އެޖިބޮޓް އޭ3 ގެ ހިއުމަނޮއިޑް ރޮބޮޓެއް ވެސް ބައިވެރިވެފައިވެއެވެ. ވަށައިގެން އެނބުރެމުން މި ރޮބޮޓްތަކުން ވަނީ ދިދަ ހޫރަމުން، "ވަޒީފާތައް ދިފާއުކުރޭ"، "ގަވާއިދުތައް ގެންނަންވެއްޖެ"، އަދި "މަޑުނުކޮށް ގަވާއިދު ހަދާ" ފަދަ ޝިއާރުތައް ދައްކާލާފައެވެ.

މި މުޒާހަރާ އިންތިޒާމުކުރުމުގައި އިސްކޮށް އުޅުއްވި ޝެގޯޝް ކުލިސް ވިދާޅުވިގޮތުގައި އޮޓޮމޭޝަނުގެ ނުރައްކާ އޮތީ ހަމައެކަނި ފެކްޓަރީތަކުގެ މަސައްކަތްތަކަށް އެކަންޏެއް ނޫނެވެ. ލިޔުމާއި، އެނަލިސިސް ހެދުމާއި، ކަސްޓަމަރ ސަޕޯޓާއި، ސޮފްޓްވެއަރ ޑިވެލޮޕްމަންޓް ފަދަ ވިސްނުން ބޭނުންވާ ބުއްދީގެ މަސައްކަތްތައް ކުރުމުގެ ގާބިލުކަން އޭ.އައި ގައި އިތުރުވަމުންދެއެވެ. ވަޒީފާތައް ގެއްލުމާއި ޓެކްނޮލޮޖީއަށް އަންނަ ހަލުވި ބަދަލުތަކަށް މަސައްކަތްތެރިންނަށް އަހުލުވެރިވެވޭ މިންވަރާ މެދު ކަންބޮޑުވުން އިތުރުވެފައިވާ ދަނޑިވަޅެއްގައި، އޭ.އައި ގެ ގަވާއިދުތަކާ މެދު އާންމުންގެ މެދުގައި ބަހުސްކުރުމަށް މަގުފަހިކުރުމަކީ މި ހަރަކާތުގެ މައިގަނޑު މަގުސަދެކެވެ.

ޕޮލެންޑުގެ ގާނޫނުތަކަށް ބަލާއިރު، ރައީސް ކަރޮލް ނަވްރޮކްކީ ވަނީ ޖުލައި މަހު އޭ.އައި ނިޒާމުތަކާ ބެހޭ ގާނޫނެއްގައި ސޮއިކުރައްވާފައެވެ. މިއީ އޭ.އައި މޮނިޓަރކުރުމުގެ އޮނިގަނޑަކާއި، އާޓިފިޝަލް އިންޓެލިޖެންސްގެ ތަރައްގީއާއި ރައްކާތެރިކަމާ ބެހޭ ކޮމިޝަނެއް އުފެއްދުމަށް ތަންފީޒުކުރި ގާނޫނެކެވެ. ރޮބޮޓްތަކަކީ އަމިއްލަ ހިޔާލެއް ނެތި ހަމައެކަނި މެސެޖު ފޯރުކޮށްދޭ ވަސީލަތްތަކެއް ނަމަވެސް، މި ތަފާތު މުޒާހަރާއިން ވަނީ ވަޒީފާތަކަށް އޭ.އައި ގެ ސަބަބުން ކުރާ އަސަރު ސަރުކާރުތަކުން ބަލަހައްޓަންޖެހޭ ގޮތާއި މެދު އުފެދެމުންދާ ބަހުސް ފާޅުކޮށްދީފައެވެ.

އޮޓޮމޭޝަންގެ ސަބަބުން އުފެއްދުންތެރިކަން އިތުރުވެ ނުރައްކާތެރި ނުވަތަ ތަކުރާރުވާ މަސައްކަތްތައް މަދުވި ނަމަވެސް، މަސައްކަތްތެރިންނާއި ސަރުކާރުތަކަށް އެކަމަށް އަހުލުވެރިވެވުމަށްވުރެ ބާރަށް ވަޒީފާތައް ގެއްލިދިއުމުގެ ބިރު އޮތުމުން، އަސަރުކުރާ ފަރާތްތަކަށް އެހީތެރިކަން ފޯރުކޮށްދިނުމާއެކު ހަރުދަނާ ގަވާއިދުތަކެއް ގެނައުމަށް އޮތް ޕްރެޝަރު ވަނީ ބޮޑުވެފައެވެ.