މަގުމަތީގެ ރައްކާތެރިކަން ކަށަވަރުކޮށް އެކްސިޑެންޓްތައް މަދުކުރުމަށް، ހުޅުމާލެ ޓްރެފިކް ފުލުހުން، ރެހެންދި ސްކޫލް ސަރަހައްދުގައި ހާއްސަ ހޭލުންތެރިކުރުމުގެ ހަރަކާތެއް ހިންގައިފިއެވެ.

މި ސެޕްޓެމްބަރު މަހުގެ 10 ވަނަ ދުވަހު ކުރިއަށް ގެންދިޔަ ހަރަކާތް އަމާޒުކޮށްފައިވަނީ ސްކޫލުގެ ދެ ސެޝަނެއްގެ ކިޔެވުން ފެށޭ އަދި ނިމޭ ގަޑިތަކަށެވެ.

މި ހަރަކާތުގެ ތެރެއިން، މަގުމަތީގައި އަމަލުކުރަންޖެހޭ ރައްކާތެރިކަމުގެ އިރުޝާދުތައް މައިކާއި ސްޕީކަރުން ވަނީ އަޑުއިއްވާފައެވެ. އަދި ހޭލުންތެރިކަން އިތުރުކުރުމުގެ މެސެޖު ބޯޑުތަކާއެކު ފުލުހުން މަގުމަތީގައި ހަރަކާތްތެރިވެފައިވާއިރު، މި ހަރަކާތުގައި ރެހެންދި ސްކޫލުގެ ޕްރިންސިޕަލާއި ޓްރެފިކް މޮނީޓަރުންގެ ގޮތުގައި ތަމްރީނުވެފައިވާ ދަރިވަރުންވެސް ވަނީ އަމަލީގޮތުން ބައިވެރިވެފައެވެ.

ފުލުހުން ވިދާޅުވިގޮތުގައި މިފަދަ ހަރަކާތްތަކުގެ ސަބަބުން ސްކޫލު ގަޑިތަކުގައި މަގުމަތީގެ ތޮއްޖެހުން ކުޑަވެ، ދަރިވަރުންނާއި ބެލެނިވެރިންނަށް ރައްކާތެރި މާހައުލެއް ގާއިމުކުރުމަށް ބޮޑު އެހީތެރިކަމަކަށްވެގެންދާނެއެވެ.

މަގުމަތީގެ އަމާންކަން ދެމެހެއްޓުމަށް ހުޅުމާލެ ޓްރެފިކް ފުލުހުން އަންނަނީ މިފަދަ މަސައްކަތްތައް މެދުނުކެނޑި ކުރަމުންނެވެ.