ރަޝިޔާއާއި ނޯތު ކޮރެއާގެ ދެމެދުގައި ތޫމަން ކޯރު ހުރަސްކޮށް ބިނާކުރި ފުރަތަމަ ބުރިޖު ރަސްމީކޮށް ހުޅުވައި، ދެގައުމުގެ ދެމެދުގައި މުދަލާއި އާންމުން ދަތުރުފަތުރުކުރުމުގެ އާ މަގެއް ގާއިމުކޮށްފިއެވެ.
މި ބުރިޖަކީ ދުވާލެއްގެ މައްޗަށް 300 އުޅަނދާއި 2,323 އާންމުންނަށް ހިދުމަތްދެވޭނެ ޖާގަ އެކުލެވޭ ބުރިޖެކެވެ. ފުރަތަމަ މަރުހަލާގައި މައިގަނޑު ގޮތެއްގައި މުދާ އުފުލުމަށް ބުރިޖުގެ ބޭނުންކުރި ނަމަވެސް، މި އަހަރުގެ ފަހުކޮޅު އާންމު ދަތުރުފަތުރަށް ބުރިޖު ރަސްމީކޮށް ހުޅުވާލުމަށް ވަނީ ރޭވިފައެވެ.
ރަޝިޔާގެ ބޮޑުވަޒީރު މިކާއީލް މިޝުސްޓިން މި ބުރިޖު ސިފަކުރެއްވީ ދެ ގައުމުގެ ދެމެދުގައިވާ "އެކުވެރިކަމުގެ އާ ރަމްޒެއް" ގެ ގޮތުގައެވެ. އަދި ނޯތު ކޮރެއާއިން ވަނީ މި ބުރިޖު ހުޅުވުމަކީ ދެ ގައުމުގެ ތާރީހުގައިވެސް "ހާއްސަ ތާރީހީ ކަމެއް" ކަމަށް ބުނެފައެވެ.
Advertisement
މި މަޝްރޫއު ނިންމާލާފައިވަނީ ޔޫކްރޭން ހަނގުރާމައާ ގުޅިގެން މޮސްކޯއާއި ޕްޔޮންގްޔަންގްގެ ދެމެދުގައި އަސްކަރީ އަދި އިގްތިސާދީ ގުޅުންތައް ވަރަށް ބޮޑަށް ބަދަހިވެފައިވާ ދަނޑިވަޅެއްގައެވެ. ނޯތު ކޮރެއާއިން ވަނީ ރަޝިޔާއަށް ހަތިޔާރާއި އުންޑަ ފޯރުކޮށްދިނުމުގެ އިތުރުން، ރަޝިޔާ ސިފައިންނަށް އެހީތެރިވުމަށް ފައުޖުތައްވެސް ފޮނުވާފައެވެ.
ޔޫކްރޭނުގެ އޯޕަން ސޯސް އިންޓެލިޖެންސް ގުރޫޕް "ޓްރޫތު ހައުންޑްސް" އިން ފާހަގަކުރި ގޮތުގައި، މި އާ ބުރިޖަކީ އަސްކަރީ ލޮޖިސްޓިކްސްގެ ބޭނުމަށް ބޭނުންކުރެވޭނެ މަގެކެވެ. އަދި މީގެ ސަބަބުން ނޯތު ކޮރެއާގެ އަސްކަރީ މުވައްޒަފުންނާއި ހަތިޔާރު ރަޝިޔާއަށް އެތެރެކުރުން އިތުރަށް ފަސޭހަވެގެންދާނެއެވެ.
މި ބުރިޖުގެ އަމަލީ މަސައްކަތް 2025 ވަނަ އަހަރު ފެށީ، 2024 ވަނަ އަހަރު ރަޝިޔާގެ ރައީސް ވްލަދިމީރު ޕުޓިން ނޯތު ކޮރެއާއަށް ކުރެއްވި ރަސްމީ ޒިޔާރަތުގައި ވެވުނު އެއްބަސްވުމެއްގެ ދަށުންނެވެ.
