އެމެރިކާގެ ރައީސް ޑޮނަލްޑް ޓްރަމްޕް، އިނގިރޭސިވިލާތުގެ ޝާހީ އާއިލާގެ ކުރީގެ މެމްބަރު ޕްރިންސް ހެރީއާއި އޭނާގެ އަނބިކަނބަލުން މޭގަން މާކްލް އެމެރިކާ ދޫކޮށް އަނބުރާ އިނގިރޭސިވިލާތަށް ބަދަލުވުމުން އުފާވާކަމަށް ވިދާޅުވެއްޖެއެވެ. އަދި އެ ދެމަފިރިންނަށް ތާއީދުނުކުރައްވާ ކަމަށްވެސް އޭނާ ވަނީ ވިދާޅުވެފައެވެ.

ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވަނީ، ހެރީއާއި މޭގަން އިނގިރޭސި ޝާހީ އާއިލާއަށް އިހުތިރާމް ކުޑަކޮށް އަމަލުކުރި ކަމަށް ބުނެ، ހާއްސަކޮށް މޭގަންގެ އަމަލުތަކަށް ވަރަށް ބޮޑަށް ފާޑުވިދާޅުވެފައެވެ.

އަދި ޓްރަމްޕް އިތުރަށް ވިދާޅުވީ، އޭނާއަކީ ޝާހީ އާއިލާގެ މެމްބަރެއްނަމަ، އެ ދެމަފިރިން އަލުން އާއިލާއަށް ބަލައިނުގަންނާނެ ކަމަށެވެ.

ޕްރިންސް ހެރީއާއި މޭގަން ޝާހީ މަސްއޫލިއްޔަތުތަކުން ދުރުވެ، އެމެރިކާގެ ކެލިފޯނިއާއަށް ބަދަލުވީ 2020 ވަނަ އަހަރުއެވެ. އެއަށްފަހު، ހެރީ ވަނީ އާއިލާގެ ތެރޭގައި ހުރި މައްސަލަތަކުގެ ވާހަކަ އާންމުކޮށް ދައްކާފައެވެ. އަދި މޭގަން ވަނީ، އޭނާގެ ދަރިފުޅު ލިބެން އުޅުނުއިރު ކުއްޖާގެ ހަމުގެ ކުލައާ މެދު ޝާހީ އާއިލާގެ ބައެއް ބޭފުޅުން ކަންބޮޑުވުން ފާޅުކުރި ކަމަށް ބުނެފައެވެ.

ހުސްވި އޯގަސްޓު މަހާއި ހަމަޔަށް އެމެރިކާގައި ހަ އަހަރު ހޭދަކުރުމަށްފަހު، އެ ދެމަފިރިން މިހާރު ވަނީ އަލުން އިނގިރޭސިވިލާތަށް ބަދަލުވެފައެވެ. އެ ދެމަފިރިން ކުރިއަށް އޮތް ތަނުގައިވެސް ތިބޭނީ ޝާހީ މަސްއޫލިއްޔަތުތައް އަދާނުކުރާ އާންމުންގެ ގޮތުގައެވެ. އަދި އެ ދެމަފިރިންގެ ދެދަރިން ކަމަށްވާ ޕްރިންސް އާޗީއާއި ޕްރިންސެސް ލިލިބެޓް ތައުލީމު ހާސިލުކުރާނީ އިނގިރޭސިވިލާތުގެ ސުކޫލުތަކުންނެވެ.