މިއަހަރުގެ ގައުމީ މާމަކާފަ ދުވަސް ފާހަގަކުރުމުގެ ގޮތުން، ޕެންޝަން އޮފީހުން އިސްނަގައިގެން ބ. އޭދަފުށީގެ މާމަކާފައިންނާއެކު ހަވީރުގެ ސައެއް ބާއްވައިފިއެވެ.
ރަށުގެ އިސްރަށްވެހިން އެއްތަނަކުން ބައްދަލުވެ، އެކުވެރި މާހައުލެއްގައި ވަގުތު ހޭދަކޮށް، އިޖުތިމާޢީ ގުޅުން ބަދަހިކުރުމުގެ ފުރުސަތު ފަހިކޮށްދިނުމުގެ މަޤުޞަދުގައި ބޭއްވި މި ހަރަކާތުގައި، އޭދަފުށީގެ މާމަކާފައިންނާއި އެ ފަރާތްތަކުގެ އާއިލާ މެންބަރުން ހިމެނޭހެން 150 އަށް ވުރެ ގިނަ މީހުން ބައިވެރިވިއެވެ.
ޕެންޝަން އޮފީހުގެ ޗީފް އޮޕަރޭޓިންގ އޮފިސަރ މަރިޔަމް ޝިއުނާ ވާހަކަފުޅު ދައްކަވަމުން، މާމަކާފައިންގެ ދުވަސް ފާހަގަކުރުމާއި އެ ބޭފުޅުންގެ އަގުވަޒަންކުރުމުގެ މުހިންމުކަމުގެ މައްޗަށް އަލިއަޅުވާލެއްވިއެވެ. ޝިއުނާ ފާހަގަކުރެއްވި ގޮތުގައި، ޤައުމީ ފެންވަރުގައި މި ދުވަސް ފާހަގަކުރުމުގެ އެންމެ ބޮޑު އެއް ބޭނުމަކީ، މުޖުތަމަޢުގައި މާމައިންނާއި ކާފައިން އަދާކޮށްފައިވާ އަދި އަދާކުރައްވަމުން ގެންދަވާ އިސް ދައުރު ފާހަގަކޮށް، ތަރުބަވީ ޖީލެއް ބިނާކުރުމަށް އެ ފަރާތްތަކުން ކޮށްފައިވާ ބުރަ މަސައްކަތުގެ އަގުވަޒަންކުރުމެވެ.
Advertisement
އޭދަފުށީ ކައުންސިލްގެ ރައީސް ޝާމީ އިބްރާހީމް ވާހަކަދައްކަވަމުން، އާއިލާތަކަށާއި މުޅި މުޖުތަމަޢަށްޓަކައި މާމައިންނާއި ކާފައިން އަދާކޮށްދެއްވާފައިވާ އަގުހުރި ދައުރު ފާހަގަކުރެއްވިއެވެ. ޝާމީ ވިދާޅުވި ގޮތުގައި، ހެޔޮލަފާ ތަރުބަވީ ޖީލެއް ބިނާކުރުމުގައި އެ ފަރާތްތަކުން ވެފައިވާ ޤުރުބާނީތަކަކީ އަގުނުކުރެވޭ ފަދަ މަތިވެރި ޚިދުމަތްތަކެކެވެ. އަދި މުޖުތަމަޢު ބިނާކުރުމުގެ އެންމެ މުހިންމު އެއް ބިންގަލަކީ މާމަކާފައިން ކަމަށްވެސް ޝާމީ ވިދާޅުވިއެވެ.
މި ހަވީރުގެ ސައިގެ ތެރެއިން، ސިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާގެ ފަރާތުން "އުފާވެރި ރާސްތާ" ޕްރޮގްރާމުގެ ސެޝަނެއްވެސް ކުރިއަށް ގެންދެވުނެވެ. މި ސެޝަންގައި ދުޅަހެޔޮ ރިޓަޔަރމަންޓެއް ބިނާކުރުމާއި، އުމުރުން ދުވަސްވަމުންދާއިރު ސިއްހަތަށް ފައިދާހުރި އާދަތައް ދެމެހެއްޓުމާ ގުޅޭ މުހިންމު މައުލޫމާތުތަކެއް ބައިވެރިންނަށް ފޯރުކޮށްދެވުނެވެ.
މި ހަރަކާތް ކުރިއަށް ގެންގޮސްފައިވަނީ ސިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާ، ލޯކަލް ގަވަރމަންޓް އޮތޯރިޓީ، އަދި ބ. އޭދަފުށީ ކައުންސިލާ ގުޅިގެންނެވެ.
މި ހަރަކާތް ހިމެނެނީ، އިސްރަށްވެހިންގެ އަގުވަޒަންކޮށް، އާއިލާތަކާއި މުޖުތަމަޢުގެ މެދުގައި އެކުވެރިކަމާއި ގުޅުން ބަދަހިކުރުމަށް މި މުއައްސަސާތަކުން ކުރަމުންދާ ހަރަކާތްތަކުގެ ތެރެއިންނެވެ. ޕެންޝަން އޮފީހުން ވަނީ، ކުރިއަށް އޮތް ތަނުގައިވެސް މިފަދަ ހަރަކާތްތައް ރާއްޖޭގެ އެކި ކަންކޮޅުތަކުގައި ބޭއްވުމަށް ނިންމާފައިވާ ކަމަށް ހާމަކޮށްފައެވެ.
