ގާނޫނު ނަންބަރު 2010/3 (ޓެކްސް ނެގުމާބެހޭ އިދާރީ ގާނޫނު) އަށް 4 ވަނަ އިސްލާހު ގެނައުމުގެ ބިލު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ތަސްދީގުކުރައްވައިފިއެވެ.
މި އިސްލާހުގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ އިދާރީ ބާރުތަކާއި، ގާނޫނުގެ ދަށުން މީރާއިން ހިންގާ އޮޑިޓުތަކާއި ތަހުގީގުތައް ހިންގުމުގެ އުސޫލުތަކާއި އިޖުރާއަތުތައް ވަނީ އިތުރަށް ހަރުދަނާކޮށްފައެވެ. އަދި ޓެކުހުގެ ގޮތުގައި ލިބެންވާ ފައިސާ ހޯދުމުގައި މީރާއަށް ލިބިގެންވާ ބާރުތައް މުރާޖައާކޮށްފައިވާއިރު، ޓެކުހާގުޅޭ ގާނޫނުތައް ތަންފީޒުކުރުމަށް ބޭނުންވާ މައުލޫމާތު ހުރި ކޮންމެ ފަރާތަކުން އެ މައުލޫމާތު މީރާއަށް ހުށަހެޅުމަށް އެންގުމުގެ އިހްތިޔާރު ކޮމިޝަނަރ ޖެނެރަލް އޮފް ޓެކްސޭޝަނަށް ވަނީ ދީފައެވެ.
މީގެ އިތުރުން، ޓެކުހާގުޅޭ އިތުރު ކުށްތަކާއި ކުށުގެ އަދަބުތައް ކަނޑައެޅުމުގެ އިތުރުން، ޓެކްސް ދައްކާ ފަރާތެއްގެ ޓެކުހުގެ އަދަދު ކަނޑައެޅުމުގައި މީރާއިން ރިއާޔަތްކުރާނެ ކަންކަމާއި ބޭނުންކުރާނެ މައުލޫމާތު ވަނީ ބަޔާންކޮށްފައެވެ. އަދި ޓެކްސް ބަޔާން ހުށަހަޅައިފައިނުވާ ފަރާތްތަކާމެދު އެޅޭނެ ފިޔަވަޅުތަކާއި، ފިޔަވަޅު އަޅައިފައިވާ ފަރާތްތަކުން އިންސްޓޯލްމަންޓަށް ބަހާލައިގެން ފައިސާ ދެއްކޭނެ އިންތިޒާމް ހަމަޖައްސައިދިނުމުގެ އިހްތިޔާރު ކޮމިޝަނަރ ޖެނެރަލަށް ލިބިގެންވާކަމަށް އިސްލާހުގައިވެއެވެ.
Advertisement
ބޭރުގެ އިދާރާތަކާއެކު ގުޅިގެން ޓެކްސް އެގްޒެމިނޭޝަން ހިންގުމާއި، ކަންޓްރީ-ބައި-ކަންޓްރީ (ސީބީސީ) ރިޕޯޓިންގ އަދި ކޮމަން ރިޕޯޓިންގ ސްޓޭންޑަރޑް (ސީއާރްއެސް) އުސޫލުތައް މި އިސްލާހުން ވަނީ ވަރުގަދަކޮށްފައެވެ. އެގޮތުން، ސީއާރްއެސް އިލްތިޒާމްތަކާ ހީލާފުވާ ފަރާތްތައް 250،000 (ދެލައްކަ ފަންސާސްހާސް) ރުފިޔާއަށް ވުރެ ބޮޑުނޫން އަދަދަކުން ޖޫރިމަނާކުރެވޭނެއެވެ.
މި އިސްލާހުގެ ދަށުން، ޓެކްސް އެޕީލް ޓްރައިބިއުނަލްގެ މެންބަރުން ހިފަހައްޓަންޖެހޭ ސުލޫކީ މިންގަނޑުތަކާއި، އޮޑިޓަރ ޖެނެރަލް ކަނޑައަޅުއްވާ ގޮތެއްގެ މަތީން މާލީ ބަޔާން އާންމުކުރުން ވަނީ ގާނޫނީގޮތުން ލާޒިމްކޮށްފައެވެ. އަދި މަދަނީ އަދި ޖިނާއީ ދައުވާ އުފުލޭނެ މުއްދަތުތައްވެސް ބަޔާންކޮށްފައިވެއެވެ.
މި އިސްލާހު ރައީސް ތަސްދީގުކުރައްވައި ދިވެހިސަރުކާރުގެ ގެޒެޓުގައި ޝާއިއުކުރެއްވުމާއެކު، މި އިސްލާހަށް މިހާރު ވަނީ އަމަލުކުރަން ފަށާފައެވެ.
