ވަޒަންވެރިވެފައިނުވާ ކޮންޓްރެކްޓަރުންގެ ވިތްހޯލްޑިންގ ޓެކްސް %10 އަށް ބޮޑުކުރުމުގެ ބިލު ރައީސް ތަސްދީގުކުރައްވައިފި

ގާނޫނު ނަންބަރު 2019/25 (އާމްދަނީން ޓެކްސް ނެގުމުގެ ގާނޫނު) އަށް 2 ވަނަ އިސްލާހު ގެނައުމުގެ ބިލު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ތަސްދީގުކުރައްވައިފިއެވެ.

މި އިސްލާހުގެ މައިގަނޑު މަގުސަދަކީ ދިވެހިރާއްޖޭގައި ހިންގާ ކޮންސްޓްރަކްޝަން މަޝްރޫއުތަކުގެ ކޮންޓްރެކްޓްތަކަށް ވާދަކުރުމުގައި، ދިވެހި ވިޔަފާރިތަކާއި ވަޒަންވެރިވެފައިނުވާ ކޮންޓްރެކްޓަރުންނާ ދެމެދު ހަމަހަމަ އަދި އިންސާފުވެރި ވާދަވެރި މާހައުލެއް ގާއިމުކުރުމެވެ.

މި ގެނެވުނު އިސްލާހާއެކު، ދިވެހިރާއްޖޭގައި ވަޒަންވެރިވެފައިނުވާ ކޮންޓްރެކްޓަރަކަށް ދައްކާ ފައިސާގެ ޖުމްލައިން ވިތްހޯލްޑިންގ ޓެކުހުގެ ގޮތުގައި ކުރިން އުނިކުރަމުން އައި 5 އިންސައްތަ، މިހާރު ވަނީ 10 އިންސައްތައަށް ބޮޑުކޮށްފައެވެ. އަދި އެގޮތަށް އުނިކުރެވޭ އަދަދަކީ އެފަރާތްތަކުން ދައްކަންޖެހޭ ފުރިހަމަ ޓެކްސް އަދަދު ކަމުގައި ގާނޫނުގައި ވަނީ ކަނޑައަޅައިފައެވެ.

މީގެ އިތުރުން، މި އިސްލާހުގައި ދިވެހިރާއްޖޭގައި ވަޒަންވެރިވެފައި ނުވާ ކޮންޓްރެކްޓަރުންނަކީ ކޮބައިކަން ވަރަށް ސާފުކޮށް ވަނީ މާނަކޮށްދީފައެވެ. މި ބަދަލުގެ ސަބަބުން ނޮން-ރެސިޑެންޓް ކޮންޓްރެކްޓަރުން ޓެކްސް ބަޔާން ހުށަހެޅުމުގައި ދިމާވާ އިދާރީ ދަތިތަކަށް ބޮޑު ލުއިފަސޭހަކަމެއް ލިބިގެންދާނެއެވެ.

އާމްދަނީން ޓެކްސް ނެގުމުގެ ގާނޫނަށް 2 ވަނަ އިސްލާހު ގެނައުމުގެ ބިލު، ރައީސުލްޖުމްހޫރިއްޔާ ތަސްދީގުކުރައްވައި ސަރުކާރުގެ ގެޒެޓުގައި ޝާއިއުކުރެއްވުމާ ގުޅިގެން، މި އިސްލާހަށް މިހާރު ވަނީ ރަސްމީކޮށް އަމަލުކުރަން ފަށާފައެވެ.