ދުނިޔޭގެ މޫސުމަށް އަންނަ ބަދަލުތަކާއެކު ހޫނުމިން ރެކޯޑު މިންވަރަކަށް މައްޗަށް ދަމުންދާއިރު، އާންމުކޮށް ބޭނުންކުރާ ބައެއް ބޭސްތަކުގެ ސަބަބުން ހަށިގަނޑަށް ހޫނު ބަރުދާސްތުކުރަން އުނދަގޫވެ، ސިއްހީ ނުރައްކާތަކާ ކުރިމަތިލާންޖެހޭ ކަމަށް ސިއްހީ މާހިރުން ހާމަކޮށްފިއެވެ.
މިގޮތުން ޑިޕްރެޝަން (ނަފްސާނީ ބަލިތައް)، އޭޑީއެޗްޑީ އަދި ލޭމައްޗަށްދާ ބައްޔާއި ހިތުގެ ބަލިތަކަށް ދޭ އާންމު ބޭސްތަކަކީ ހަށިގަނޑުން ފެން މަދުވުމާއި (ޑީހައިޑްރޭޝަން) ހޫނާ ގުޅުންހުރި އެކި މައްސަލަތައް އިތުރުކޮށްދޭ ބޭސްތަކެކެވެ. ސިއްހީ ތަޖުރިބާކާރުން ބަޔާންކުރާ ގޮތުގައި މި ބޭސްތަކުގެ ސަބަބުން، ހަށިގަނޑުގެ ފިނިހޫނުމިން ކޮންޓްރޯލްކުރުމަށް ސިކުނޑީގައި ހުންނަ ނިޒާމު ކަމަށްވާ "ހައިޕޯތަލަމަސް" ގެ މަސައްކަތަށް ބުރޫއަރައެވެ.
ޔޫރަޕަށް ދާދިފަހުން ކުރިމަތިވި ހޫނުގަދަ މޫސުމުގައި، ބްރަސަލްސްގައި ދިރިއުޅޭ އުމުރުން 28 އަހަރުގެ އިލިއާނާ އޮކުމުސް ވަނީ އެހެން މީހުންނަށްވުރެ ބޮޑަށް ހޫނުގެ އަސަރު އޭނާއަށް ކުރާކަން ފާހަގަކުރެވިގެން އެކަމުގެ ކަންބޮޑުވުން ފާޅުކޮށްފައެވެ. އޭނާ ބުނިގޮތުގައި ގެއިން ބޭރަށް ނުކުންނަ އިރަށް ދާހިއްލައި، ވަރުބަލިވެ ގިނަ ވަގުތު ނިދަން ޖެހުމުގެ މައްސަލަ ދިމާވިއެވެ. ފަހުން އޭނާއަށް އެނގުނު ގޮތުގައި އެއީ ޑިޕްރެޝަނަށް އޭނާ ބޭނުންކުރަމުންދިޔަ ބޭހުގެ ސަބަބުން ދިމާވި ކަމެކެވެ. ހަމައެފަދައިން، އެމެރިކާގެ ލޮސް އެންޖެލިސްގެ ރައްޔިތެއް ކަމަށްވާ ކެރޮލައިން ފްރައިސިނެޓް ވެސް ވަނީ އެއްފަހަރާ ނަފްސާނީ ބައްޔާއި އޭޑީއެޗްޑީއަށް ބޭސް ބޭނުންކުރުމުން ހޫނު މޫސުމުގައި އާދަޔާޚިލާފަށް ދާހިއްލައި، ވިސްނުން އެއްކުރަން އުނދަގޫވިކަން ހާމަކޮށްފައެވެ.
Advertisement
ސިއްހީ މާހިރުން ވިދާޅުވާ ގޮތުގައި، ޑިޕްރެޝަނަށް ދޭ އެންޓިޑިޕްރެސަންޓް (އެސްއެސްއާރުއައި ފަދަ) ބޭސްތަކުގެ ސަބަބުން ސިކުނޑީގައިވާ ސެރޮޓޯނިން މާއްދާ އިތުރުވެ، ދާހިއްލުން އިންތިހާއަށް އިތުރުވެއެވެ. މީގެއިތުރުން ލޭމައްޗަށްދާތީ ދޭ ބޭސްތަކާއި ޑައިޔުރެޓިކްސް (ކުޑަކަމުދާ އެއްޗެހި) ބޭސްތަކުގެ ސަބަބުން ކަރުހިއްކުން އިހުސާސްވުމަށް ހުރަސްއެޅި، ގުރުދާ (ކިޑްނީ) ފެއިލްވުމާއި ހާޓްއެޓޭކް ޖެހުމުގެ ފުރުސަތު ބޮޑުވެއެވެ. އަދި ހިތުގެ ބައްޔަށް ބޭނުންކުރާ "ބީޓާ ބްލޮކާސް" ގެ ސަބަބުން ހަމަށް ލޭދައުރުވުން މަދުވެ، ހަށިގަނޑުން ހޫނު ބޭރުކުރުމަށް ހުރަސްއެޅެއެވެ.
ޔުނިވަރސިޓީ އޮފް ކޮލޮރާޑޯގެ ޑޮކްޓަރެއް ކަމަށްވާ ލޯގަން ހާޕަރ ވިދާޅުވީ، އުމުރުން ދުވަސްވީ މީހުންނާއި ބޭރުގައި މަސައްކަތްކުރާ ފަރާތްތަކަށް މިކަމުގެ ނުރައްކާ ވަކިން ބޮޑު ކަމަށެވެ. އަދި އެއްފަހަރާ އެކި ވައްތަރުގެ ގިނަ ބޭސްތައް ބޭނުންކުރުމަކީ ހޫނުގަދަ ދުވަސްވަރު ފުރާނައަށް ވެސް ނުރައްކާވެދާނެ ކަމެއް ކަމަށް އޭނާ ފާހަގަކުރެއްވިއެވެ.
މި ނުރައްކާތައް އޮތް ނަމަވެސް، ޑޮކްޓަރެއްގެ ލަފައެއް ނެތި އަމިއްލައަށް ބޭސް ބޭނުންކުރުން ހުއްޓާނުލުމަށް ސިއްހީ މާހިރުން ހަރުކަށިކޮށް އިންޒާރު ދެއެވެ. ސަބަބަކީ ބޭސް ހުއްޓާލުމުން ބަލި އަލުން އިތުރަށް ގޯސްވުމުގެ ފުރުސަތު އޮތުމެވެ. އެހެންކަމުން، ހޫނުގަދަ ދުވަސްވަރު ގިނައިން ފެން ބުއިމަށާއި، އަވީގައި ގިނައިރު ނޫޅުމަށާއި، ހޫނުގެ ސަބަބުން މާބޮޑަށް ބޮލަށް އެނބުރުން އެރުން ނުވަތަ ވާނުވާ ނޭނގޭ ހާލަތަކަށް ގޮސްފިނަމަ ލަސްނުކޮށް އަވަސް ފަރުވާއަށް އެދުމަށް ޑޮކްޓަރުން ވަނީ އިރުޝާދު ދެއްވާފައެވެ.
