ރާއްޖޭގެ ފަތުރުވެރިކަމުގެ ސިނާއަަތަށް އައިސްފައިވާ ބަދަލުތަކުގެ ތެރެއިން މިދިޔަ އަހަރު ޑިސެމްބަރު މަހު ފާސްކޮށްފައިވާ ބިލާއެކު އައިސްފައިވާ ބަދަލުތަކަކީ ރާއްޖޭގެ އިގްތިސާދަށް އެތައް ހެޔޮ އަސަރުތަކެއް ކުރާނެ ކަމަށް، އެމްއެމްޕީއާރުސީގެ ކުރީގެ ޑިޕިއުޓީ މެނޭޖިންގ ޑައިރެކްޓަރ ބައްސާމް އާދަމް ވިދާޅުވެއްޖެއެވެ.

ހުލާސާ ނިއުސްއަށް ދެއްވި އިންޓަވިއުގައި ބައްސާމް ވިދާޅުވީ، މި އައު ބަދަލުތަކާއެކު ރާއްޖޭގެ އިގްތިސާދަށް އެތައް ހެޔޮ އަސަރުތަކެއް ކުރާއިރު، އަމިއްލަ ވިޔަފާރިތަކުގެ އިތުރުން ފްރީ ލާންސް ކުރާ ފަރާތްތަކަށް އެތައް ދޮރުތަކެއް ހުޅުވޭން ކަމަށެވެ. އަދި ކުދި ވިޔަފާރިތައް ފަތުރުވެރިކަމުގެ ސިނާއަތުގެ މަޝްރޫއު ތަކުގައި ބައިވެރިކުރެވި ވަކިވަކި ފަރުދުންގެ ފަންނުވެރިކަމަށް ފުރުސަތުތައް ލިބިގެންދާނެ ކަމުގައި ވެސް ބައްސާމް ވިދާޅުވިއެވެ.

ސްޓެޓިސްޓިކްތަކަށް ރިއާޔަތްކޮށް ބައްސާމް ވިދާޅުވީ ކޮންމެ މަހަކު ރާއްޖެއަށް އެތައް ޓޫރިސްޓުންނެއް އަންނަ އިރު، ގާތްގަނޑަކަށް 50 މިލިއަން ޑޮލަރު ރާއްޖެއިން ބޭރުވާ ކަމަށެވެ. އެހެންކަމުން، އައު ޕޮލިސީގެ ސަބަބުން ރާއްޖެއިން ބޭރަށްދާ ޑޮލަރުގެ އަދަދު މަދުވެގެންދާނެ ކަމުގައި އެ މަނިކުފާނު ވިދާޅުވިއެވެ.

އަދި، މި ބިލްގެ ދަށުން ތަޢާރަފް ވެފައިވާ ހަލާލް ޓޫރިޒަމްގެ ސަބަބުން އިތުރު ޓޫރިސްޓް މާކެޓުތަކަށް ދޮރުހުޅުވި، ފަތުރުވެރިކަމުގެ ސިނާއަތް އިތުރަށް ފުޅާކުރެވޭނެ ކަމުގައި ވެސް ބައްސާމު ވިދާޅުވިއެވެ.

ގައުމުގެ ތަރައްގީއަށް ކުރައްވާ މަސަައްކަތުގެ ތެރެއިން، ރައީސުލް ޖުމްހޫރިއްޔާ ޑރ މުހައްމަދު މުއިއްޒު ރާއްޖޭގެ ސިނާއަތަށް ވަނީ ވަރަށް ބޮޑެތި ބަދަލުތަކެއް ގެނެސްފައެވެ. ސަރުކާރުގެ ހިއްސާ އޮންނަ ކުންފުނިތަކަށް ޓޫރިޒަމްގެ ބޭނުމުގައި ރަށާއި، ބިމާ ފަޅު ދޫކުރެވޭގޮތް ހަދާދެއްވާ، ރިސޯޓު ހަދަން ދޫކޮށްފައިވާ މުއްދަތު އިތުރުކުރުމާއި، ދިވެހި ރާއްޖޭގައި ޓުއަރ އޮޕަރޭޓަރ ލައިސެންސާއި އެކު މެނުވީ އެ ޚިދުމަތް ފޯރުކޮށްނުދެވުން މިއީ އޭގެތެރެއިން ގެނެސްފައިވާ ބައެއް ބަދަލުތަކެވެ.