މާލޭގެ ރެސްޓޯރެންޓެއްގެ ތެރޭގައި އަންހެނަކަށާއި އިތުރު ބަޔަކަށް ހަމަލާދީ މާރާމާރީ ހިންގި 19 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން ވިދާޅުވީ، މާލޭ މާފަންނުގައި ހުންނަ ރެސްޓޯރެންޓެއްގައި މާރާމާރީއެއް ހިންގަމުންދާ ކަމުގެ މައުލޫމާތު ފުލުހުންނަށް ރިޕޯޓްކޮށްފައިވަނީ 2026 އޮގަސްޓް 22 ވަނަ ދުވަހުގެ ރޭގަނޑު 23:00 އެހައިކަންހާއިރު ކަމަށެވެ.

މި ހާދިސާއާ ގުޅިގެން މިހާތަނަށް ބެލި ބެލުމުން އެނގިފައިވާ ގޮތުގައި، ރެސްޓޯރެންޓް ތެރޭގައި ހިނގި ހަމަނުޖެހުމެއްގެ ތެރެއިން އެތަނުގައި އިން އަންހެނަކަށް ފިރިހެނަކު ވަނީ ހަމަލާދީފައެވެ. އަދި އެ ހަމަނުޖެހުން ހުއްޓުވުމަށް އެ ވަގުތު އެތަނުގައި ތިބި ބަޔަކު މަސައްކަތް ކުރުމުން، އެ މީހުންނަށް ވެސް އޭނާ ވަނީ ހަމަލާދީފައެވެ. މީގެ އިތުރުން އެ ރެސްޓޯރެންޓްގެ ދޮރަށް ވެސް އެކިވަރުގެ ގެއްލުންތައް ދީފައިވާ ކަމަށް ފުލުހުން މައުލޫމާތު ދެއެވެ.

މި މާރާމާރީގައި ރެސްޓޯރެންޓުގައި މަސައްކަތްކުރާ އަންހެން މުވައްޒަފެއްގެ ބޮލަށް ހަމަލާދިނުމުގެ ސަބަބުން، އޭނާގެ ބޯ ދުޅަވެ އަނިޔާވެފައިވާ ކަމަށް ވެސް ފުލުހުން ބުނެފައިވެއެވެ.

މި މައްސަލައިގެ ތުހުމަތުގައި ފުލުހުން ވަނީ އުމުރުން 19 އަހަރުގެ ދިވެހި ފިރިހެނަކު ހައްޔަރުކޮށްފައެވެ.

ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.