ލޯކަލް ކައުންސިލްތަކުގެ ބިންތަކާއި އިމާރާތްތައް ދައުލަތުގެ މަރުކަޒީ ސިޔާސަތުތަކާ އެއްގޮތްވާ ގޮތުގެ މަތިން، އެންމެ ފައިދާހުރި ގޮތުގައި ބޭނުންކުރުމަށް މަގުފަހިކުރުމަށްޓަކައި ލާމަރުކަޒީ ގާނޫނަށް ހުށަހަޅާފައިވާ އިސްލާހާ ގުޅިގެން ރައްޔިތުންގެ މަޖިލީހަށް ހުށަހެޅި ދެ ޕެޓިޝަނަށް ބަހުސްކުރުމަށް ކޮންމެ ޕެޓިޝަނަކަށް ގަޑިއިރެއްގެ ވަގުތު ކަނޑައެޅުމަށް ރައްޔިތުންގެ މަޖިލީހުގެ އާންމު ކޮމިޓީން ނިންމައިފި އެވެ.

ރައްޔިތުންގެ މަޖިލީހުގެ އިދާރާގައި ބޭއްވި އެ ބައްދަލުވުމުގައި ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހަޅުއްވައި، އަލިފުށި ދާއިރާގެ މެންބަރު އަބްދުއްލަތީފް އަބްދުއްރަހްމާން ތާއީދުކުރެއްވި މި ހުށަހެޅުން ފާސްވީ ކޮމިޓީގެ ހަތަރު މެންބަރުންގެ އިއްތިފާގުންނެވެ. މަޖިލީހުގެ ގަވާއިދުގެ 110 ވަނަ މާއްދާގައިވާ އުސޫލުގެ ދަށުން ބަހުސްގެ ވަގުތު ބެހުމަށް ހަމަޖެހިފައިވަނީ ސިޔާސީ ޕާޓީތަކުގައި މެންބަރުން ތިއްބެވި ނިސްބަތުންނެވެ.

މި އިސްލާހަކީ ރަށު ފެންވަރުގައާއި ގައުމީ ފެންވަރުގައި ހިންގޭ ތަރައްގީގެ ބިޔަ މަޝްރޫއުތައް މަރުހަލާތަކެއްގެ ތެރެއިން ލަސްވިޔަނުދީ، ރައްޔިތުންނަށް އެންމެ ފުރިހަމަ ލާބަޔާއި މަންފާ ލިބޭނެހެން ބިންތައް މެނޭޖުކުރުމަށް ސަރުކާރުން އިސްނަގައިގެން، ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ހުށަހަޅުއްވާފައިވާ މުހިންމު ބިލެކެވެ. ސަރުކާރުގެ މި ހަރުދަނާ ތަރައްގީގެ ސިޔާސަތަށް ތާއީދުކޮށް، ގައުމީ މަސްލަހަތު އިސްކުރުމަށް ގޮވާލައި އައްޑޫ މީދޫ ކައުންސިލްގެ ރައީސް އަހްމަދު ޝާތިރު އިސްވެ ހުށަހެޅުއްވި ޕެޓިޝަނަށް ރައްޔިތުންގެ ފަރާތުން ވަނީ ވަރަށް ބޮޑު ތަރުހީބެއް ލިބިފަ އެވެ. އެގޮތުން ގައުމުގެ ކުރިއެރުމަށް އެދޭ 10،000 އަށްވުރެ ގިނަ ރައްޔިތުން ވަނީ ސަރުކާރުގެ ސިޔާސަތުތައް ދަމަހައްޓަން ބޭނުންވާކަން ހާމަކޮށް މި ޕެޓިޝަނުގައި ސޮއިކޮށްފަ އެވެ.

މިއާ ހިލާފަށް، ސަރުކާރުން ރައްޔިތުންގެ ލާބަޔަށް ކުރާ މަސައްކަތްތަކުގެ މަގްސަދު އޮޅޭގޮތަށް ބައެއް އާންމު ޖަމިއްޔާތަކުން ވަނީ މި ބިލު ބޭރުކުރުމަށް ގޮވާލައި 2،300 އެއްހާ މީހުންގެ ސޮޔާއެކު އިދިކޮޅު ޕެޓިޝަނެއް ހުށަހަޅާފަ އެވެ. އަދި ސަރުކާރުގެ ސިޔާސަތަށް ތާއީދުކޮށް ހުށަހެޅި ބޮޑު ޕެޓިޝަނަށް ރައްޔިތުން އަމިއްލައަށް ދީފައިވާ ބޮޑު ތަރުހީބު ކުޑަކޮށް ދެއްކުމުގެ ގޮތުން، އެއީ ވަޒީފާގެ ބިރުދައްކައިގެން ހޯދި ސޮއިތަކެއް ކަމަށް ބުނެ ސިޔާސީ ގޮތުން ހަގީގަތާ ހިލާފު ތުހުމަތުތަކެއް ވެސް ވަނީ ފަތުރާފަ އެވެ.