ދިވެހިރާއްޖޭގެ ފަތުރުވެރިކަން މާކެޓްކޮށް، ދެ ގައުމުގެ ދެމެދުގައި އޮތް ވައިގެ ދަތުރުފަތުރުގެ ގުޅުންތައް ބަދަހިކުރުމަށްޓަކައި ސަރުކާރުގެ މުހިންމު ވަފުދަކުން ރަޝިޔާއަށް ކުރި ރަސްމީ ދަތުރަކީ ވަރަށް ކާމިޔާބު ދަތުރެއްގެ ގޮތުގައި، ޓުއަރިޒަމް ވިޔަފާރިވެރިޔާ ޝާޒް ވަލީދު ވިދާޅުވެއްޖެއެވެ.
ރާއްޖޭގެ ދެވަނައަށް އެންމެ ބޮޑު މާކެޓް ކަމަށްވާ ރަޝިޔާ މާކެޓް އިތުރަށް ފުޅާކުރުމަށް ސަރުކާރުން އިސްނަގައިގެން ކުރިއަށްގެންދިޔަ މި ދަތުރަކީ، މިހާތަނަށް ފަތުރުވެރިކަމުގެ ސިނާއަތަށް ލިބުނު ބޮޑު ކުރިއެރުމެކެވެ. މިއީ ރާއްޖޭގެ އިގްތިސާދީ ދާއިރާ އާ އުސްމިންތަކަކަށް ގެންގޮސްދިނުމަށްޓަކައި މި ސަރުކާރުގެ ހަރުދަނާކަމާއި ގާބިލުކަން ސާބިތުކޮށްދިން އަލިގަދަ ހެއްކެކެވެ.
މި ދަތުރާ ގުޅޭގޮތުން ޚުލާސާއަށް ދެއްވި ބަސްދީގަތުމެއްގައި ފަތުރުވެރިކަމުގެ ދާއިރާގެ ތަޖުރިބާކާރު ޝާޒް ވަލީދު ވިދާޅުވީ، ރަޝިޔާ މާކެޓް ރާއްޖެއަށް ފުޅާކުރުމަށްޓަކައި ފާއިތުވި ހުރިހާ ސަރުކާރުތަކެއްގައި އާދޭސް ކޮށްފައިވާނެ ކަމަށެވެ. ނަމަވެސް އެމްއޭސީއެލް އާއި ޓުއަރިޒަމް މިނިސްޓްރީ އާއި ރާއްޖޭގެ މުހިންމު ފަރާތްތައް ހިމެނޭ ބޮޑު ވަފުދަކާއެކު މިފަދަ ކަމަކަށް އިސްނަގަން ކުރީގެ ސަރުކާރުތަކުން ތިބީ ފަހަތުފަޔަށް ބުރަވެ، ފަސްޖެހިފައެވެ. ޝާޒް ފާހަގަކުރެއްވި ގޮތުގައި، އަމިއްލަ ސިނާއަތުގެ އެދުމަކަށް އިޖާބަދީ، ރަޝިޔާ މާކެޓް އިތުރަށް ފުޅާކުރަން މި ސަރުކާރުން އެއްބަސްވެ، މި ދަތުރުގައި ބައިވެރިވުމަކީ ފަތުރުވެރިކަމުގެ ސިނާއަތަށް ލިބުނު ބޮޑު ހިއްވަރެކެވެ.
Advertisement
“ކުރީ ސަރުކަރުތަކުގައި އަޅުގަނޑުމެން ހަމަ އާދޭސް ދެންނެވިން ރަޝިޔާ މާކެޓް ފުޅާކުރުމަށް. އެކަމަކު ހަމަ ފަހަތުފަޔަށް ބުރަވީ. މިސަރުކާރުން މިކަމަށް އިޖާބަ ދިނުމަކީ ފަތުރުވެރިކަން ކުރިއެރުވުމަށް މި ސަރުކާރުން މަސައްކަތްކުރާ ކަމުގެ އަލިގަދަ ހެއްކެއް. މިސަރުކާރުން ނަމޫނާ ދައްކައިފި. މި ކަމުގެ ސަބަބުން ކުރިއަށް އޮތް ތަނުގައި ރަޝިޔާއިން ރާއްޖެއަށް އަންނަ ފަތުރުވެރިންގެ އަދަދު އެތައް ގުނައަކަށް އިތުރުވެގެންދާނެ” ޝާޒް ވިދާޅުވިއެވެ.
މި ދަތުރާ ބެހޭގޮތުން އެކި ފަރާތްތަކުން ސިޔާސީ ގޮތުން ތަފާތު ވާހަކަތައް ދައްކަމުން ދަނީ ހަޖަމުނުވެގެން ކަމަށް ޝާޒް ވިދާޅުވިއެވެ. މިއީ ރާއްޖޭގެ ފަތުރުވެރިކަމުގެ މުސްތަގުބަލަށްޓަކައި ވަރަށް މުހިންމު، އަދި އެހާމެ ބޭނުންތެރި ދަތުރެއްކަން މި ދަތުރުގައި ބައިވެރިވި ދެވަނަ ފަރާތުން ވެސް ގަބޫލުކުރެއެވެ.
ޓޫރިޒަމް މިނިސްޓަރު މުހައްމަދު އަމީން އިސްކޮށް ހުންނަވައި، ވިޒިޓް މޯލްޑިވްސް އާއި އެމްއޭސީއެލް ވެސް ގުޅިގެން ކުރިއަށްގެންދިޔަ މި ދަތުރުގައި، ރަޝިޔާގެ ޑެޕިއުޓީ ޓްރާންސްޕޯޓް މިނިސްޓަރާއެކު ބޭއްވި ބައްދަލުވުންތަކުގައި ދެ ގައުމުގެ ދެމެދުގައި ފްލައިޓްތައް އިތުރުކުރުމަށް ވަނީ އެއްބަސްވެފައެވެ. މި ހަރުދަނާ ފިޔަވަޅުތަކަކީ "ވިޒިޓް މޯލްޑިވްސް އިޔާ 2027" އަށް ސަރުކާރުން ވަމުންދާ ވަރުގަދަ ތައްޔާރީތަކުގެ ބައެކެވެ.
ކުރީގެ ސަރުކާރުތަކަށް ކުރަން ނުކެރުނު ބޮޑެތި ކަންކަން މި ސަރުކާރުން އަމަލީގޮތުން ކުރަމުންދާ ދިއުމަކީ ގައުމުގެ އިގްތިސާދު ހަމަ މަގަށް އެޅުވުމަށް ސަރުކާރުން ކުރާ އިޚްލާސްތެރި މަސައްކަތުގެ ހެއްކެކެވެ.
