ޓެކްސްގެ ގާނޫނަކަށް ބަދަލެއް އަންނަ ކޮންމެ ފަހަރަކު، އާންމު ރައްޔިތުންގެ އެންމެ ބޮޑު ކަންބޮޑުވުމަކީ ދިރިއުޅުމުގެ ހަރަދުތައް ބޮޑުވެދާނެތީ އެވެ. ނަމަވެސް، "ޑެސްޓިނޭޝަން ޕްރިންސިޕަލް" އަށް ބިނާކޮށް ހުށަހަޅާފައިވާ މި އިސްލާހުގެ ސީދާ އަމާޒަކީ ރާއްޖޭގެ ފަތުރުވެރިކަމުގެ ހިދުމަތްތައް ވިއްކާ ބޭރުގެ ކުންފުނިތަކެވެ. މިއީ އާންމު ރައްޔިތުންގެ ދިރިއުޅުމުގެ ޒަރޫރީ ހަރަދުތަކާ ގުޅުންހުރި ކަމެއް ނޫނެވެ.
މިއީ އާ ޓެކްސެއް ނޫނެވެ. މުދަލާއި ހިދުމަތުގެ އަގުން ނަގާ ޓެކްސް (ޖީ.އެސް.ޓީ) އަކީ މިހާރުވެސް ރާއްޖޭގައި ނަގަމުންދާ ޓެކްސެކެވެ. މީގެ ތެރޭގައި ފަތުރުވެރިކަމުގެ ދާއިރާއިން ނަގާ 17 އިންސައްތައިގެ ޓެކްސް ހިމެނެއެވެ. މި އިސްލާހުގެ ބޭނުމަކީ، ރާއްޖެއިން ބޭރުގެ ޓްރެވަލް އެޖެންޓުންނާއި، ޓުއަރ އޮޕަރޭޓަރުންނާއި، އޮންލައިން ބުކިންގް ޕްލެޓްފޯމްތަކުން ހިދުމަތް ވިއްކާއިރު، މިހާރު ޓެކްސް ނުނެގި ދޫވާ ބައިތަކުން ޓެކްސް ނެގުމެވެ.
މި ބަދަލުގެ މަގްސަދަކީ އިތުރު ޓެކްސެއް ތައާރަފުކުރުމުގެ ބަދަލުގައި، މިހާރުވެސް އޮތް ޓެކްސް ހަމަހަމަކަމާއެކު ހުރިހާ ފަރާތްތަކެއްގެ އަތުން ނެގުމެވެ.
Advertisement
އާންމު ޒަރޫރީ ހިދުމަތްތަކަށް މީގެ އަސަރެއް ނުކުރާނެ
ފަތުރުވެރިކަމުގެ ދާއިރާއަށް އަމާޒުކޮށް ގެންނަ މި ބަދަލުގެ ސަބަބުން ކާބޯތަކެތި، ސިއްހީ ހިދުމަތް، ކަރަންޓު ނުވަތަ ފެނުގެ އަގު ބޮޑުވެގެން ނުދާނެއެވެ. މިއީ މި އިސްލާހުގެ ތެރޭގައި ހިމެނޭ ކަންކަމެއް ނޫނެވެ.
ބޭރުގެ ޓުއަރ އޮޕަރޭޓަރަކު ރާއްޖޭގެ ރިސޯޓަކުން ކޮޓަރިއެއް ގަތުމަށްފަހު، އެއަށްވުރެ ބޮޑު އަގުގައި ފަތުރުވެރިޔާއަށް އެ ކޮޓަރި ވިއްކަފާނެއެވެ. މިހާރު ޖީ.އެސް.ޓީ ނެގެނީ ހަމައެކަނި ރާއްޖޭގެ ރިސޯޓަށް ލިބޭ ފައިސާގެ މިންވަރަށެވެ. ނަމަވެސް މި އިސްލާހުގެ ސަބަބުން، ބޭރުގެ ކުންފުނިން އިތުރަށް ނަގާ ފައިދާއިންވެސް ޖީ.އެސް.ޓީ ނެގޭނެއެވެ. ސަބަބަކީ އެ ހިދުމަތަކީ ރާއްޖޭގައި ދެވޭ ހިދުމަތަކަށް ވާތީއެވެ.
މި މުއާމަލާތުގައި ޓެކްސް ދައްކާ ފަރާތަކީ ރާއްޖެއަށް ޒިޔާރަތްކުރާ ފަތުރުވެރިޔާއެވެ. ބޭރުގެ ކުންފުނީގެ ޒިންމާއަކީ އެ ޓެކްސް ފަތުރުވެރިޔާގެ އަތުން ނަގައި ރާއްޖޭގެ ދައުލަތަށް ދެއްކުމެވެ.
މި ބަދަލަށް އަމަލުކުރަން ފަށާނީ ކޮން އިރަކު؟
ބިލުގައި ހުށަހަޅާފައިވަނީ ބޭރުގެ ކުންފުނިތަކުން ވިއްކާ ފަތުރުވެރިކަމުގެ ހިދުމަތްތަކުން 1 އޮކްޓޫބަރު 2026 އިން ފެށިގެން ޖީ.އެސް.ޓީ ނެގުމަށެވެ. މީރާއިން ބޭރުގެ އެފަދަ ފަރާތްތަކާ ގުޅިގެން، ރަޖިސްޓްރީވުމާއި ފައިސާ ދެއްކުމުގެ ފަސޭހަ އިންތިޒާމުތަކެއް ހަމަޖައްސާނެއެވެ.
މި ބަދަލުގެ ސަބަބުން ބޭރުގެ ކުންފުނިތަކުން ރާއްޖެއަށް ހިދުމަތް ދިނުން ހުއްޓާލާނެ ކަމަކަށް ނުބެލެވެއެވެ. މިއީ ދުނިޔޭގެ 60 އަށްވުރެ ގިނަ ގައުމުގައި މިހާރުވެސް އަމަލުކުރަމުންދާ ބައިނަލްއަގުވާމީ އުސޫލެކެވެ.
އާންމު ރައްޔިތުންނަށް އޮތް އެންމެ މުހިންމު ނުކުތާއަކީ، މިއީ މިހާރުވެސް އޮތް ޖީ.އެސް.ޓީގެ ނިޒާމުގެ ތެރެއިން، ކުރިން ޓެކްސް ނުނެގި ދޫވާ ފަތުރުވެރިކަމުގެ މުއާމަލާތްތައް ހިމެނުމަށް ކުރެވޭ ކަމެއް ކަމެވެ. މިއީ ދިވެހި އާއިލާތަކުން ކުރާ ޒަރޫރީ ހަރަދުތަކަށް އަމާޒުކޮށްގެން ނަގާ އިތުރު ޓެކްސެއް ނޫނެވެ.
