ދިވެހިރާއްޖޭގެ އިގްތިސާދީ ހާލަތު ހުރިގޮތުން ދައުލަތުގެ ހަރަދުތައް ކުޑަކުރުމަށް ގިނަ ފިޔަވަޅުތަކެއް އަޅަމުންދާ މި ދަނޑިވަޅުގައި، ރައްޔިތުންގެ މަޖިލީހުގެ މެންބަރުންނަށް ލިބިދޭ ހާއްސަ ހެލްތު އިންޝޫރެންސް ޕެކޭޖު އުވާލުމަށް ގޮވާލާ އަޑުތައް އާންމުންގެ މެދުގައި ގަދަވެއްޖެއެވެ.
ދައުލަތުގެ ބަޖެޓަށް ނުކަތާވަރުގެ ބޮޑެތި ޚަރަދުތަކެއް ހިނގާ މިފަދަ ޕްރީމިއަމް އިންޝޫރެންސް ސްކީމްތަކަކީ މިހާރުގެ ރައީސް ޑރ. މުހައްމަދު މުއިއްޒުގެ ސަރުކާރުން އަލަށް ތައާރަފުކޮށް، މެންބަރުންނަށް ދޭން ފެށި އިނާޔަތްތަކެއް ނޫނެވެ. މިއީ މާޒީގައި އެމްޑީޕީގެ ވެރިކަމުގެ ދައުރުގެ ތެރެއިން، މަޖިލީހުގެ މެޖޯރިޓީ ބޭނުންކޮށްގެން ފާސްކޮށް، ފަށާފައިވާ ކަމެކެވެ. މިއަދުގެ ސަރުކާރަށް މި ކަންކަން ތަރިކައިގެ ގޮތުގައި ވާރުތަވެފައިވާއިރު، މިއީ ކުރީގެ ސަރުކާރުން ފެށި ބޭކާރު ޚަރަދެއްކަން ސާފުކޮށް އެނގެން އެބަ އޮތެވެ.
މި ހާއްސަ އިނާޔަތަކީ 2008 ވަނަ އަހަރު އުފެދުނު އެމްޑީޕީގެ ވެރިކަމުގެ ފަސްފަހަތުން، 2013 ވަނަ އަހަރުގެ ކުރީކޮޅު ފާސްކުރި ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން މެންބަރުންނަށް ހޯދައިދިން ބޮޑު އިމްތިޔާޒެކެވެ. އާންމު ރައްޔިތުންނަށް ދޭ "އާސަންދަ" ޚިދުމަތަށް ބޮޑެތި ބަދަލުތަކެއް ގެނެސް ކޯ-ޕޭމަންޓް ނިޒާމެއް ތައާރަފްކުރަން ސަރުކާރުން ރާވަމުންދާއިރު، މެންބަރުންގެ މިފަދަ ބޮޑެތި އިނާޔަތްތައް ދެމިއޮތުމަކީ ބޭއިންސާފެއް ކަމަށް ބުނެ ޕެޓިޝަނުގައި ސޮއިކުރި މީހުންގެ އަދަދު 2465 އަށް މިހާރު ވަނީ އަރާފައެވެ.
Advertisement
މި ގާނޫނު ފާސްކުރި ދުވަސްވަރަކީ އެމްޑީޕީގެ ޓިކެޓުގައި ނައިބު ރައީސްކަމަށް ވަޑައިގެންނެވި ޑރ. މުހައްމަދު ވަހީދު ހަސަން މަނިކުގެ ވެރިކަމުގެ ދައުރު ކަމަށްވީ ނަމަވެސް، މަޖިލީހުގެ ތަޅުމުގައި މި ބިލް ފާސްކުރުމަށް އެމްޑީޕީގެ މެންބަރުންނާއި އޭރުގެ އިދިކޮޅު ޕާޓީތަކުން ވަނީ އެއްގަލަކަށް އަރާފައެވެ. ގާނޫނުގައިވާ ގޮތުން މަޖިލީހުގެ ކޮންމެ މެންބަރަކަށާއި އެބޭފުޅެއްގެ އާއިލާއަށް ރާއްޖެއިން ބޭރުން، ހާއްސަކޮށް ސާކް އަދި އާސިއާން ގައުމުތަކުން ވީއައިޕީ ފެންވަރުގެ ބޭސްފަރުވާ ލިބޭނެ އިންޝޫރެންސް ދައުލަތުން ދޭންޖެހެއެވެ.
މީގެ އިތުރުން، މަޖިލީހުން ވަކިވެފައިވާ ކުރީގެ މެންބަރުންނަށްވެސް އުމުރަށް މި ޚިދުމަތް ލިބޭ ގޮތަށް އޮތުމަކީ ދައުލަތުގެ ބަޖެޓަށް ކޮންމެ އަހަރަކު އެތައް މިލިއަން ރުފިޔާގެ ބުރައެއް އުފުލަންޖެހޭ ކަމެކެވެ.
ސޯޝަލް މީޑިއާގައާއި އެކި މަންސަތަކުގައި އާންމުން ބުނަމުން ދަނީ، ރާއްޖޭގެ އެންމެ މަތީ މުސާރަ އާއި އިނާޔަތްތައް ލިބޭ މަޖިލިސް މެންބަރުންނަށް ދައުލަތުގެ ހަރަދުގައި ބޭރު ގައުމުތަކުން ސިއްހީ ފަރުވާ ދިނުން މިހާރުން މިހާރަށް ހުއްޓާލަން ޖެހޭ ކަމަށެވެ. އަދި ދައުލަތުގެ ބަޖެޓު ކުޑަކުރުމުގެ ސިޔާސަތު ފެށެން ޖެހޭނީ ރައްޔިތުންގެ މަންދޫބުންގެ ކިބައިން ކަމަށްވާއިރު، މި ގާނޫނަށް އަވަސް އިސްލާހެއް ގެނެސް މެންބަރުން ވެސް އާންމު ރައްޔިތުންނެކޭ އެއްފަދައިން އާސަންދަ ނިޒާމުގެ ތެރެއަށް ބަދަލުކުރުމަށް ގިނަ ބަޔަކު ދަނީ މަޖިލީހަށް ގޮވާލަމުންނެވެ.
ޕެޓިޝަންގައި ވަނީ 2015 އިން 2025 އަށް މަޖިލިސް މެންބަރުންގެ ހެލްތު އިންޝުއަރެންސް ޕްރިމިއަމް އަށް 100 މިލިއަނެއްހާ ރުފިޔާ ހަރަދުކޮށްފައިވާކަން ފާހަގަކޮށްފަ އެވެ. އަދި މެންބަރުކަން ކުރެއްވުމަށްފަހު ވަކިވެ ވަޑައިގަންނަވާ ކޮންމެ މެންބަރަކަށް އުމުރު ދުވަހަށް މި އިންޝުއަރެންސް ދޭން ޖެހޭތީ މިއަދަދުތައް އަހަރަކަށް ވުރެ އަހަރެއް އެތައް ގުނައެއް އިތުރުވާ ކަމަށެވެ.
