މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެންމެ ފަހުން އާންމުކޮށްފައިވާ ތަފާސް ހިސާބުތަކަށް ބަލާއިރު، ނިމިދިޔަ ޖޫން މަހާ އަޅާބަލާއިރު ޖުލައި މަހު އެ އޮތޯރިޓީން ޑޮލަރު ވިއްކި އަދަދު ބޮޑުތަނުން އިތުރުވެފައިވާކަން ހާމަވެއްޖެއެވެ.
އެމްއެމްއޭގެ ތަފާސް ހިސާބުތައް ދައްކާގޮތުން، ޖުލައި މަހަކީ އެމްއެމްއޭއަށް ބޭރުފައިސާ ލިބުނު ޖުމްލަ އަދަދަށްވުރެ، އެ އޮތޯރިޓީން ބޭރުފައިސާ ވިއްކި ޖުމްލަ އަދަދު އިތުރުވި މަހެކެވެ. މި ބަދަލު އައުމުގެ މައިގަނޑު ސަބަބަކީ ފާއިތުވި ޖުލައި މަހަކީ ރާއްޖޭގެ ފަތުރުވެރިކަމުގެ އޯފް-ސީޒަން ކަމަށް ވުމާއެކު، އެމްއެމްއޭއަށް ލިބުނު ބޭރުފައިސާގެ އަދަދު ދަށްވުމެވެ. މީގެ އިތުރުން، ޖުލައި މަހަކީ ސްކޫލް ބަންދާ ދިމާކޮށް ގިނަ ބަޔަކު ރާއްޖޭއިން ބޭރަށް ދަތުރުކުރުމުގެ ސަބަބުން ޑޮލަރަށް އޮންނަ ޑިމާންޑް އާދަޔާ ހިލާފަށް ބޮޑުވެގެން ދިޔަ މަހެކެވެ.
ތަފާސް ހިސާބުތަކުން ދައްކާގޮތުގައި، ދަތުރުފަތުރާއި، ބޭސްފަރުވާއާއި، އުމްރާގެ ދަތުރުތަކަށް އެމްއެމްއޭއިން ޖުލައި މަހު ޑޮލަރު ވިއްކި މިންވަރު ވަނީ ޖޫން މަހާ އަޅާބަލާއިރު %172 އަށް އިތުރުވެފައެވެ.
Advertisement
ބޭންކިންގ ނިޒާމުގެ ތެރެއިން ބޭރު ފައިސާ ލިބުން ފަސޭހަކޮށްދިނުމަށާއި ބާޒާރަށް ދިމާވެފައިވާ ދަތިތަކަށް ލުޔެއް ހޯދައިދިނުމަށްޓަކައި، ބޭންކުތަކަށް ވިއްކާ ޑޮލަރުގެ މިންވަރު އިތުރުކުރުމަށް އެމްއެމްއޭއިން ވަނީ މި އޮގަސްޓް މަހުގެ 11 ވަނަ ދުވަހު ނިންމާފައެވެ. މި ނިންމުމުގެ ދަށުން، މި ހަފްތާއިން ފެށިގެން ކުރިއަށް އޮތް ތިން ހަފްތާގެ މުއްދަތަށް ބޭންކުތަކަށް ވިއްކާ ޑޮލަރުގެ މިންވަރު %51 އިތުރުކުރެވޭނެއެވެ. މީގެ މައިގަނޑު ބޭނުމަކީ ވިޔަފާރިތަކުން މުދާ އިމްޕޯޓްކުރުމަށް ބޭނުންވާ ޓީޓީ އަދި އެލްސީ ހުޅުވުމުގައި ހުރި ދަތިތަކަށް ހައްލެއް ހޯދައިދިނުން ކަމަށް އެމްއެމްއޭއިން ބުނެއެވެ.
ނަމަވެސް، ޑޮލަރު ވިއްކި މިންވަރު އިތުރުވުމާ ގުޅިގެން ރާއްޖޭގެ ރަސްމީ ރިޒާވަށް ވަނީ އޭގެ އަސަރުކޮށްފައެވެ. އެމްއެމްއޭގެ ހިސާބުތަކުން ދައްކާގޮތުގައި ޖުލައި މަސް ނިމުނުއިރު ރާއްޖޭގެ ރަސްމީ ރިޒާވް ވަނީ 686.8 މިލިއަން ޑޮލަރުން 638.0 މިލިއަން ޑޮލަރަށް ދަށްވެފައެވެ. މިއީ ގާތްގަނޑަކަށް %7 ގެ ދަށްވުމެކެވެ.
