މާލީ ގޮންޖެހުންތަކާއެކު ރާއްޖޭގެ ރިޒާވް ދެމެހެއްޓުމަށްޓަކައި ސަރުކާރުން އެކަށައަޅާފައިވާ ޑޮލަރު މާރުކުރުމުގެ ސިޔާސަތަކީ އެވަގުތުގެ ބޭނުމަށް ބަލާއިރު ވަރަށް މުހިންމު އަދި ރަނގަޅު ސިޔާސަތެއް ކަމަށް ކުރީގެ ޗީފް ބަޖެޓު އެގްޒެކެޓިވް އަދި އިގުތިސާދީ ތަޖުރިބާކާރު އަހުމަދު ޝަރުވަސް އާދަމް ވިދާޅުވެއްޖެއެވެ.

ރާއްޖޭގެ ދެމީޑިއާއެއް ގުޅިގެން ކުރިއަށްގެންދިޔަ ޚާއްސަ ޕްރޮގްރާމެއްގައި ވާހަކަދައްކަވަމުން ޝަރުވަސް ވިދާޅުވީ، ނެގެޓިވް ރިޒާވެއްގައި ގައުމެއް ނުހިފެހެއްޓޭނެ ކަމަށާއި، ބާޒާރުގައި ހުރި ޑޮލަރު މަރުކަޒީ ބޭންކަށް ގެނެސްގެން، ރިޒާވް މަތިކުރުމަށް ސަރުކާރުން އެޅި އެ ފިޔަވަޅަކީ ވަރަށް ބޭނުންތެރި ފިޔަވަޅެއް ކަމަށެވެ. އަދި މި ސިޔާސަތުގެ ސަބަބުން ރާއްޖޭގެ ރިޒާވް ވަރުގަދަވެގެން ގޮސްފައިވާކަން އޭނާ ފާހަގަކުރެއްވިއެވެ.

ޝަރުވަސް ވިދާޅުވި ގޮތުގައި ރާއްޖޭގެ އިގުތިސާދީ ކުރިއެރުން ނުވަތަ ގްރޯތު އެބަހުއްޓެވެ. ނަމަވެސް ބަޖެޓުގެ ޑެފިސިޓް ކުޑަކުރުމަށްޓަކައި ޓީޖީއެސްޓީއާއި، ޖީއެސްޓީ އަދި އެއާޕޯޓް ފީތައް ބޮޑުކުރުމަށް ފެށި ސިޔާސަތުތައް ދެމެހެއްޓެނިވި ގޮތެއްގައި ކުރިއަށް ގެންދަންޖެހޭ ކަމަށް އޭނާ ބަޔާންކުރެއްވިއެވެ.

ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާއި ފިޒްކަލް ސައިޑުން ޑޮލަރަށް އޮތް ޑިމާންޑް ބޮޑުވުމުގެ ގޮންޖެހުންތަކުން އަރައިގަތުމަށްޓަކައި، ބޭރުގެ ގައުމުތަކާއި އައިއެމްއެފް ފަދަ ބައިނަލްއަގުވާމީ މާލީ އިދާރާތަކާއެކު އޮންނަ މުއާމަލާތްތަކާއި ޑައިލޮގްތައް މެދުނުކެނޑި ކުރިއަށް ގެންދިއުމަކީ މިފަދަ ދަނޑިވަޅެއްގައި ބޭނުންތެރި ކަމެއްކަމަށް ޝަރުވަސް އިރުޝާދު ދެއްވިއެވެ.

ބޭރުގެ މަގުތަކުން މާލީ އެހީތެރިކަން ހޯދުމުގައި ހުރި ގޮންޖެހުންތައް ހައްލުކުރުމަށް މަސައްކަތްކުރާއިރު، ދިމާވާ ހާލަތްތަކުގައި ރާއްޖޭގެ އެތެރޭގެ މާކެޓަށް ބަރޯސާވެގެން ބޭރުގެ ދަރަނިތައް އަދާކުރަން ޖެހުމުން، އެތެރޭގެ ބާޒާރުގައި ބޭރުފައިސާ (ޑޮލަރު) މަދުވުމުގެ ފުރުސަތު އޮންނަކަން ޝަރުވަސް ފާހަގަކުރެއްވިއެވެ. އެހެންކަމުން، ދަރަނި އަނބުރާ ދައްކަންޖެހޭ ދުވަހު ގައުމުގެ މާލީ ހާލަތު ދެމެހެއްޓެނިވި ގޮތެއްގައި ހިފެހެއްޓުމަށްޓަކައި، ބޭރުގެ މާލީ ވަސީލަތްތައް ހޯދުމުގެ މަސައްކަތް ވަރުގަދަކުރުމާއެކު، ސަރުކާރުން މިހާރުވެސް އަޅަމުންދާ ފަދަ ރިޒާވް ވަރުގަދަކުރުމުގެ މުހިންމު ސިޔާސަތުތަކުގެ ބޭނުން ހިފުން ބުއްދިވެރި ކަމަށް ޝަރުވަސްގެ ވާހަކަފުޅުގައި ފާހަގަކުރެއްވިއެވެ.