ރައްޔިތުންގެ މަޖިލީހަށް ހުށަހެޅިފައިވާ މުހިންމު ބިލްތަކާއި ނިންމަންޖެހޭ އަވަސް މަސައްކަތްތަކެއް ހުރުމުން، ހިންގަމުންދާ މިއަހަރުގެ ދެވަނަ ދައުރުގެ މުއްދަތު މި ހިނގާ އޯގަސްޓް މަހުގެ 20 ވަނަ ދުވަހުގެ ނިޔަލަށް އިތުރުކުރުމަށް މަޖިލީހުން މިއަދު ފާސްކޮށްފިއެވެ. މަޖިލީހުގެ ޖަލްސާގައި މިގޮތަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 58 މެންބަރުންގެ އިއްތިފާގުންނެވެ.

މިއަހަރުގެ ދެވަނަ ދައުރުގެ މުއްދަތު އިތުރުކުރުމަށް ރިޔާސަތުން ހުށަހަޅުއްވަމުން، މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ، ދައުރު ދަންމާލަން ޖެހުނީ ޤައުމީ ފެންވަރުގައި ނިންމަންޖެހޭ ބޮޑެތި އަދި މުހިންމު މަސައްކަތްތަކެއް މަޖިލީހުގެ ތަޅުމުގައާއި ކޮމިޓީތަކުގައި ހުރުމުން، އެ މަސައްކަތްތައް ނިންމާލުމުގެ ބޭނުމުގައެވެ. މަޖިލީހުގެ ގަވާއިދު ބުނާގޮތުން، ދެވަނަ ދައުރުގެ ޖަލްސާތައް ޖޫން 1 އިން ފެށިގެން ކުރިއަށްގޮސް އޯގަސްޓް 15 އަށް (ކުރިއަށް އޮތް ހޮނިހިރު ދުވަހަށް) އެއްކޮށް ނިންމަންޖެހެއެވެ.

ނަމަވެސް، ގަވާއިދުގައިވާ ގޮތުގެ މަތިން ދައުރު ހަމަވާއިރު މުހިންމު މަސައްކަތްތައް ނުނިމި ހުރެއްޖެނަމަ، މެންބަރުންގެ މެދުގައި ނަގާ ވޯޓަކުން ދައުރުގެ މުއްދަތު އިތުރުކުރުމުގެ ބާރު މަޖިލީހަށް ލިބިގެންވެއެވެ. ސަރުކާރުގެ މޭސްތިރިކަމާއެކު ރައްޔިތުންނަށް ފައިދާހުރި ގިނަ މަޝްރޫޢުތަކަކާއި ޤާނޫނީ އިޞްލާޙުތަކެއް ކުރިއަށްދާ މި ދަނޑިވަޅުގައި، މަޖިލީހުގެ ދައުރު އިތުރުކުރުމަކީ ޤައުމީ މަސައްކަތްތައް ހުއްޓުމެއްނެތް ބާރުދުވެލީގައި ކުރިއަށްގެންދިއުމަށް އެޅުނު މުހިންމު ފިޔަވަޅެކެވެ. މަޖިލީހުގެ ތިންވަނަ ދައުރުގެ ޖަލްސާތައް ގަވާއިދުން ފެށޭނީ އަންނަ އޮކްޓޯބަރު މަހުގެ އެއްވަނަ ދުވަހުއެވެ..