އދ. އޮމަދޫ ބަނދަރު އަޕްގްރޭޑް ކުރުމަށްޓަކައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މަޝްރޫޢުގެ ޖުމްލަ 42 އިންސައްތަ މަސައްކަތް ނިމިފައިވާ ކަމަށް އެ ކުންފުނިން ހާމަކޮށްފިއެވެ.
މިނިސްޓްރީ އޮފް އިިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓްގެ ފަރާތުން އެމްޓީސީސީއާ މި މަޝްރޫއު ހަވާލުކޮށްފައިވަނީ 17 ޖުލައި 2023 ގައެވެ. މި މަޝްރޫޢުގެ އަގަކީ 72,322,592.58 (ހަތްދިހަ ދެ މިލިއަން ތިންލައްކަ ބާވީސް ހާސް ފަސްސަތޭކަ ނުވަދިހަ ދެ ރުފިޔާ ފަންސާސް އަށް ލާރި) އެވެ. މަސައްކަތް ފެށުމަށްޓަކައި ސައިޓް މޮބިލައިޒްކޮށްފައިވަނީ 30 ޖުލައި 2023 ގައެވެ.
މި މަޝްރޫއުގެ ދަށުން ކުރިއަށްދާ މައިގަނޑު މަސައްކަތްތަކުގެ ތެރޭގައި ހިމެނެނީ:
Advertisement
ބަނދަރު ފުންކުރުމާއި ނެރު ފުންކުރުން (ޖުމްލަ 61,870 ކިއުބިކް މީޓަރު)، މީގެ ތެރޭގައި މިހާރު އޮތް ބަނދަރުގެ މެއިންޓެނަންސް ފުންކުރުންވެސް ހިމެނެއެވެ.
- 346.1 މީޓަރުގެ އެލް-ބްލޮކް އެއްގަމު ތޮށިލުން.
- 606 މީޓަރުގެ ބޭރު ތޮށިލުމާއި ރިވެޓްމަންޓް ޖެހުން.
- 1,647.11 އަކަމީޓަރުގެ ސަރަޙައްދެއްގައި ޕޭވްމަންޓް ހެދުން.
- 150 މީޓަރުގެ ޖެޓީއެއް ހެދުން.
- ބަނދަރު ބައްތި ހަރުކުރުން.
އެމްޓީސީސީން އެންމެ ފަހުން އާންމުކުރި މައުލޫމާތުގައިވާ ގޮތުން، މިހާރު ސައިޓުގައި ކުރިއަށްދަނީ ބޭރު ރިވެޓްމަންޓް އެއްގަމުތޮށީގެ ބްލޮކްލައިން ކޮނުމާއި، އެއްގަމު ތޮށީގެ ބްލޮކް ޖެއްސުމުގެ މަސައްކަތްތަކެވެ.
އދ. އޮމަދޫގެ ބަނދަރުގެ މަސައްކަތް ނިމުމުން، އެ ރަށުގެ ދަތުރުފަތުރާއި، ކަނޑުމަތީގެ ރައްކާތެރިކަން އިތުރުވެ، އުމްރާނީ ގޮތުން ބޮޑު ކުރިއެރުމެއް ލިބިގެންދާނެއެވެ. މި މަޝްރޫޢުގެ މަސައްކަތްތައް ހަލުވިކަމާއެކު މިހާރުވެސް ދަނީ ކުރިއަށެވެ.
