އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) އިން ބޭނުންކުރާ މިސައިލްތަކަކީ ވައިގެ ދިފާއީ ނިޒާމުތަކަށް ހީލަތްތެރި ހަމަލާތަކެއް ދެވޭނެ ފަދަ، އަދި ދިފާއީ އައްޑަނަތައް ފޫއަޅުވާލުމުގެ ގާބިލްކަން ލިބިގެންވާ އާ ޓެކްނޮލޮޖީއެއް އެކުލެވޭ ހަތިޔާރުތަކެއް ކަމަށް އީރާނުން ބުނެފިއެވެ. އީރާނުގެ ތަރުޖަމާނު ހާމަކުރެއްވި ގޮތުގައި، އީރާނުގެ އާ މިސައިލްތަކަކީ އަމިއްލައަށް މަގުދައްކައި، ދަތުރުކުރަމުންދާ މަގު ބަދަލުކުރުމުގެ ގާބިލްކަން ލިބިގެންވާ އެއްޗެހި ކަމުން، ދުޝްމަނުންގެ ވައިގެ ދިފާއީ ނިޒާމުތަކަށް އެ ހުއްޓުވުމަކީ ނުވަތަ އަތުލައިގަތުމަކީ މިއަދު މުސްތަހީލު ކަމެކެވެ.
މި ޓެކްނޮލޮޖީގެ އެންމެ ފާހަގަކޮށްލެވޭ އަދި ބިރުވެރި ސިފައަކީ، މިސައިލް އުދުހެމުންދާ ވަގުތު (މިޑް-ފްލައިޓްގައި) ވެސް އޭގެ އަމާޒު ބަދަލުކޮށްލުމުގެ ގާބިލްކަން ލިބިފައިވުމެވެ. ތަރުޖަމާނު ވިދާޅުވީ، ވަކި ހާއްސަ އަމާޒަކަށް ފޮނުވާލާ މިސައިލެއް ނަމަވެސް، ދަތުރުގެ މެދުތެރެއިން ކުއްލިއަކަށް އޭގެ މިސްރާބު ބަދަލުކޮށް، ދެވަނަ އަމާޒަކަށް ފޮނުވާލުމުގެ ފުރުސަތު އެމީހުންނަށް އޮންނާނެ ކަމަށެވެ. މިއީ ދުނިޔޭގެ އެންމެ ޒަމާނީ ދިފާއީ ނިޒާމުތައް ވެސް އޮޅުވާލައި، "ހެކްކޮށްލާ" ފަދަ ވަރުގަދަ ކުރިއެރުމެކެވެ.
