ބޭންކް އޮފް މޯލްޑިވްސް (ބީއެމްއެލް) އިން ކުރިއަށްގެންދާ މެއިންޓަނެންސް މަސައްކަތެއްގެ ސަބަބުން، މިރޭ ދަންވަރު ބޭންކުގެ ބައެއް ހިދުމަތްތަކަށް ބުރޫއަރާފާނެ ކަމަށް އެ ބޭންކުން ހާމަކޮށްފިއެވެ.
ބީއެމްއެލް އިން މައުލޫމާތު ދޭ ގޮތުގައި މި މަސައްކަތް ކުރިއަށް ދާނީ އޮގަސްޓް 7 ވާ ހުކުރު ދުވަހުގެ ދަންވަރު 12:00 އިން ފެށިގެން އޮގަސްޓް 8 ވާ ހޮނިހިރު ދުވަހުގެ ފަތިހު 3:45 އާ ހަމައަށެވެ. މިއީ ބޭންކުގެ ސިސްޓަމްތައް އަޕްގްރޭޑްކޮށް، ހިދުމަތްތަކުގެ ފެންވަރު ރަނގަޅު ކުރުމަށްޓަކައި ތާވަލުކޮށްގެން ކުރިއަށްގެންދާ މަސައްކަތެކެވެ.
މި ވަގުތުތަކުގައި ބޭންކުގެ ބައެއް ހިދުމަތްތައް މެދުކެނޑޭނެއެވެ. އޭގެ ތެރޭގައި ހިމެނެނީ:
Advertisement
- ކާޑު އެކްޓިވޭޓް ކުރުމާއި، ފްރީޒް ނުވަތަ އަންފްރީޒް ކުރުން އަދި ބްލޮކް ކުރުން.
- ކާޑުގެ ޕިން ބަދަލުކުރުން.
- ކާޑުގެ ތަފްސީލާއި ޓްރާންސެކްޝަން ހިސްޓްރީ ބަލާލުން.
- ކާޑު މެދުވެރިކޮށް ފައިސާ ދެއްކުމާއި އަދި ކޭޝް އެޑްވާންސްގެ ހިދުމަތް.
ނަމަވެސް، މި މުއްދަތުގައި އާންމުކޮށް ވިޔަފާރިކުރުމަށާއި އޭޓީއެމް މެދުވެރިކޮށް ފައިސާ ނެގުމަށް ބޭނުންކުރާ ކާޑުގެ ހިދުމަތްތައް މެދުކެނޑުމެއްނެތި ލިބޭނެ ކަމަށް ބޭންކުން ބުނެއެވެ. މީގެ އިތުރުން، އިންޓަނެޓް ބޭންކިންގ އަދި މޮބައިލް އެޕް މެދުވެރިކޮށް ކުރާ އެހެނިހެން ހިދުމަތްތައް ކަމަށްވާ ފައިސާ ފޮނުވުމާއި، ބިލްތަކަށް ފައިސާ ދެއްކުން ފަދަ ހިދުމަތްތައްވެސް އާންމު އުސޫލުން ލިބޭނެއެވެ.
މި މަސައްކަތުގެ ސަބަބުން ކަސްޓަމަރުންނަށް ދިމާވެދާނެ ދަތިތަކަށްޓަކައި ބޭންކް އޮފް މޯލްޑިވްސް އިން ވަނީ މާފަށް އެދިފައެވެ.
