ލ. އަތޮޅުން ހިލައާއި ހިލަވެލި ބަރުކޮށްގެން ހުވަދުއަތޮޅަށް ދަތުރުކުރަނިކޮށް ގއ. އެކިފަރު ކައިރިން ކަނޑުވި "ފްރެންޑް 4" ސަޕްލައި ދޯނި ބަންޑުން ޖަހާލައި އަޑިއަށް ދިޔަ ހާދިސާގައި ގެއްލުނު ދޯނީގެ ކައްޕި މުހައްމަދު ހަމްދޫން ތ. މަޑިފުށި، ދޮންވެލި، 35އ. ކަނޑުގެ އަޑިއަށް ގެއްލުމުގެ ކުރިން ސޯޝަލް މީޑިއާއަށް ދޫކޮށްލި އަސަރުގަދަ ފަހު ވީޑިއޯއިން މުޅި ރާއްޖެ ރޮއްވާލައިފިއެވެ.
ބިޔަ ކަނޑުގެ ތެރޭގައި ދޯނި ދަތުރުކުރާ މަންޒަރު ފެންނަ އެ ވީޑިއޯގެ ފަހަތަށް އޭނާ އަޅާފައިވަނީ ކީރިތި ގުރުއާނުގެ އާޔަތްތަކެއްގެ އުރުދޫ ބަހުގެ އަސަރުގަދަ ތަރުޖަމާއެކެވެ. އޭގައި ބުނެފައިވަނީ ބިރުވެރިކަމާއި، ބަނޑުހައިހޫނުކަމާއި، މުދަލާއި ފުރާނައިގެ އުނިކަމުން (ގެއްލުމުން) ﷲ އަޅުތަކުން އިމްތިހާނު ކުރައްވާނެ ކަމަށާއި، އެފަދަ މުސީބާތްތަކުގެ ވަގުތުގައި ކެތްތެރިވުމަށާއި ނަމާދުން އެހީތެރިކަން ހޯދުމަށެވެ. މިއީ ދޯނި ފެތި ބޮޑު މުސީބާތެއް ކުރިމަތިވުމުގެ ކުރިން އޭނާއަށް ކުރެވުނު އިހުސާސެއްގެ ސަބަބުން ދޫކޮށްލި ފަހު ވަސިއްޔަތް ކަމަށް ބުނެ ގިނަބަޔަކު ދަނީ ހިތްދަތިކަން ފާޅުކުރަމުންނެވެ.
ދޯނި އަޑިޔަށް ދިޔަ ހާދިސާ ހިނގާފައިވަނީ 5 އޮގަސްޓް 2026 ވީ ބުދަ ދުވަހުގެ ރޭ 23:22 އެހާކަންހާއިރުއެވެ. ކަނޑުގަދަވެ ދޯންޏަށް ރާޅު އަރައި ދިޔަވަމުންދާ ކަމުގެ ރިޕޯޓު އެމްއެންޑީއެފްއަށް ލިބުމާއި ގުޅިގެން ފުލުހުންނާއި އެމްއެންޑީއެފް އިން ހިންގި އޮޕަރޭޝަނުގެ ތެރޭގައި ދޯނީގައި ތިބި 7 ބިދޭސީ ފަޅުވެރިން ސަލާމަތް ކުރެވުނު ނަމަވެސް، ނޫސްތަކުން ރިޕޯޓުކޮށްފައިވާ ގޮތުގައި، ދޯނި އަޑިއަށްދިޔަ ވަގުތު ދޯނިން ފެން ހިއްކުމުގެ މަސައްކަތުގައި ކައްޕިއާއެކު އުޅުނު އެމްއެންޑީއެފްގެ ސިފައިންގެ ބޭކަލަކާއި ފުލުހުންގެ އޮފިސަރަކު ވެސް ވަނީ ދޯނި ފުރޮޅިގެން ދިޔަ ވަގުތު ގެއްލިފައެވެ.
Advertisement
މި ހާދިސާގައި ކަނޑަށް ގެއްލިފައިވާ މީހުންނަކީ ދޯނީގެ ކައްޕި މުހައްމަދު ހަމްދޫން ގެ އިތުރުން، އެހީތެރިކަން ފޯރުކޮށްދިނުމުގައި ހަރަކާތްތެރިވި އެމްއެންޑީއެފްގެ ސިފައިންގެ މީހާ އިބްރާހިމް އަހުމަދު 39އ އަދި ފުލުހުންގެ އޮފިސަރު އަލީ ނާފިއު 33އ، އެވެ.
އެމްއެންޑީއެފް ކޯސްޓްގާރޑާއި ފުލުހުން އަދި ޑްރޯން ސްކޮޑާއި މޯލްޑިވިއަންގެ ފްލައިޓްތައް ބޭނުންކޮށްގެން ވައިގެ މަގުންނާއި ކަނޑުގެ މަގުން މި ތިން މީހުން ހޯދުމުގެ ވަރުގަދަ އޮޕަރޭޝަނެއް މިހާރުވެސް ދަނީ ހުއްޓުމެއްނެތި ކުރިއަށް ގެންދަމުންނެވެ.
