ޤައުމީ ބޭންކް، ބޭންކް އޮފް މޯލްޑިވްސް (ބީއެމްއެލް) ގެ ޒިންމާދާރުކަން އިތުރުކުރުމަށާއި، ކަސްޓަމަރުންނަށް ދެމުންދާ ޚިދުމަތްތައް އިތުރަށް ފަސޭހަކޮށް ހަލުވިކުރުމުގެ މަޤްޞަދުގައި ބޭންކުގެ އިދާރީ އޮނިގަނޑަށާއި އެގްޒެކްޓިވް ޓީމުގެ ދައުރުތަކަށް މުހިންމު ބަދަލުތަކެއް ގެނެސްފިއެވެ.

ބޭންކުގެ ބޯޑު އޮފް ޑައިރެކްޓަރުންގެ ބަލައިގަތުމާއެކު މިއަދުން ފެށިގެން ޢަމަލުކުރަން ފެށި މި އާ އޮނިގަނޑުގެ ދަށުން، ސީނިއާ މެނޭޖްމަންޓް ޓީމުގެ ހަތަރު މެމްބަރަކު ކުރިއަށް އޮތް ހަ މަސް ދުވަހުގެ މުއްދަތަށް އެ ބޭފުޅުންގެ މަޤާމުތަކާ ގުޅުންހުރި އެހެން ދާއިރާތަކުގެ މަސްއޫލިއްޔަތުތަކާ ވަނީ ހަވާލުވެފައެވެ. މިގޮތުން ގެނެވުނު ބަދަލުތަކުގެ ތެރޭގައި;

1. އައިޝަތު ޒަމްރާ ޒާހިރު ޗީފް ކޮމާޝަލް އޮފިސަރުގެ މަޤާމަށް،
2. މޫސާ ނިމާލް ޗީފް މާކެޓިން އޮފިސަރުގެ މަޤާމަށް،
3. ރަޝްފާ ޖައުފަރު ޗީފް ރިސްކް އޮފިސަރުގެ މަޤާމަށް އަދި
4. ގެރީ ލޯޓަން ޗީފް ކްރެޑިޓް އޮފިސަރުގެ މަޤާމަށް ވަނީ ހަމަޖައްސާފައެވެ.

މި ބަދަލާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރު މުހައްމަދު ޝަރީފް ވިދާޅުވީ، ބޭންކު މިވަގުތު އޮތީ މާލީގޮތުން ވަރަށް ހަރުދަނާ ހާލަތެއްގައި ކަމަށާއި، އިސް މަޤާމުތަކުގެ ދައުރުތަކަށް ވަގުތީގޮތުން މި ގެނެވުނު ބަދަލަކީ ލީޑަޝިޕް ވަރުގަދަކުރުމަށްޓަކައި ކުރެވުނު މުހިންމު އިންވެސްޓްމަންޓެއް ކަމަށެވެ. ތަޖުރިބާކާރު ވެރިންނަށް އެ ބޭފުޅުންގެ ދާއިރާއާ ގުޅުންހުރި އެހެން ދާއިރާތަކުގެ ތަޖުރިބާ ހޯދައިދިނުމަކީ، އެ ބޭފުޅުންގެ ހުނަރު އިތުރުވުމުގެ އިތުރުން މުޅި މުއައްސަސާއަށް ލިބޭނެ ވަރަށް ބޮޑު ކުރިއެރުމެއްކަން ފާހަގަކުރައްވަމުން ސީއީއޯ ވިދާޅުވީ، މިއީ ހުރިހާ ފަންތިއެއްގައި ދިވެހި ހުނަރުވެރި ވެރިން ބިނާކުރުމަށް ބޭންކުން ދޭ އަހުމިއްޔަތު ހާމަކޮށްދޭ ކަމެއް ކަމަށެވެ.

ބީއެމްއެލްއިން ހާމަކުރި ގޮތުގައި މިއީ ބޭންކުގެ ދެމެހެއްޓެނިވި ކުރިއެރުމަށާއި، ކަސްޓަމަރުންނާ އޮންނަ ގުޅުން އިތުރަށް ބަދަހިކޮށް، ޚިދުމަތުގެ ފެންވަރު މަތީ ދަރަޖައަކަށް ގެންދިއުމަށް އެކުލަވައިލާފައިވާ ދުރުރާސްތާގެ ސްޓްރެޓެޖިކް އަމާޒުތަކާ އެއްގޮތަށް އެޅުނު ފިޔަވަޅެކެވެ. މިއީ ބޭންކުގެ އެތެރޭގެ ހިންގުމަށް ގެނެވުނު ބަދަލުތަކަކަށް ވާތީ، ކަސްޓަމަރުންނަށް ބޭންކުން ފޯރުކޮށްދޭ ޕްރޮޑަކްޓްތަކާއި ޚިދުމަތްތަކަށް ނުވަތަ މިހާރު މުއާމަލާތް ކުރަމުންދާ އުސޫލުތަކަށް އެއްވެސް ބަދަލެއް ނާންނާނެ ކަމަށާއި، މީގެ އެންމެ ބޮޑު ބޭނުމަކީ ކަސްޓަމަރުންނަށް ފޯރުކޮށްދޭ ޚިދުމަތުގެ ފެންވަރު އިތުރަށް މަތިކުރުން ކަމަށްވެސް ބޭންކުން ބުނެއެވެ.