އޭޝިއަން ބޭންކާސް އެސޯސިއޭޝަން (އޭބީއޭ) ގެ ޗެއާމަންގެ މަގާމަށް ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް އައްޔަންކޮށްފިއެވެ. މިއީ މި ޝަރަފުވެރި މަގާމަށް ދިވެއްސަކު އައްޔަންކުރެވުނު ފުރަތަމަ ފަހަރެވެ.
އޭބީއޭގެ ބޯޑުން މި ނިންމުން ނިންމާފައިވަނީ އެ އެސޯސިއޭޝަންގެ ގަވާއިދާ އެއްގޮތްވާ ގޮތުގެ މަތިންނެވެ. މުޙައްމަދު ޝަރީފް މި މަގާމާ ރަސްމީކޮށް ހަވާލުވެވަޑައިގަންނަވާނީ މިއަދުގެ ވަގުތެއްގައެވެ.
މުހައްމަދު ޝަރީފަކީ މީގެ ކުރިންވެސް އެ އެސޯސިއޭޝަންގައި މުހިންމު މަސައްކަތްތަކެއް ކުރައްވާފައިވާ ބޭފުޅެކެވެ. އެގޮތުން 2018 އިން 2020 އަށް އޭނާ ވަނީ އޭބީއޭގެ ވައިސް ޗެއާމަންގެ މަގާމު ފުރުއްވާފައެވެ. އެ މުއްދަތުގެ ތެރޭގައި އެސޯސިއޭޝަންގެ އިސްތިރާތީޖީ މަސައްކަތްތަކުގައާއި، ސަރަހައްދީ ބޭންކުތަކުގެ މެދުގައި ގުޅުން ބަދަހިކުރުމުގައި އޭނާ ވަނީ މުހިންމު ދައުރެއް އަދާކުރައްވާފައެވެ.
Advertisement
ޝަރީފްގެ ހިންގުންތެރިކަމާއި ތަޖުރިބާއަށް އޮތް އިތުބާރުގެ ބޮޑުކަމުން، 2025 ވަނަ އަހަރު އަލުން އޭނާ ވަނީ އެސޯސިއޭޝަންގެ ވައިސް ޗެއާމަންގެ މަގާމަށް އައްޔަންކުރެވިފައެވެ.
އޭޝިއަން ބޭންކާސް އެސޯސިއޭޝަނަކީ އޭޝިއާ ސަރަހައްދުގެ ބޭންކުތަކުގެ މެދުގައި ގުޅުން ބަދަހިކޮށް، ބޭންކިންގ ދާއިރާ ކުރިއެރުވުމަށް މަސައްކަތްކުރާ އެންމެ ބޮޑު އެއް ޖަމިއްޔާއެވެ. މިފަދަ ބައިނަލްއަގުވާމީ ޖަމިއްޔާއެއްގެ އެންމެ އިސް މަގާމަށް ދިވެއްސަކު އައުމަކީ ރާއްޖޭގެ މާލީ ދާއިރާއަށް ލިބުނު ވަރަށް ބޮޑު ކުރިއެރުމެކެވެ.
